Supporting Content
Here is the Kernewek script for today's An Nowodhow
Dohajydh da, ha dynnargh dhe dhyllans an seythen ma 'An Nowodhow' war BBC Radyo Kernow.
*
Herwydh nebes kowethyansow tornyasek, yma re a dus ow ty’golya yn Kernow an hav ma.
Awos an goredhom Kovid, yma moy a dus ow tos dhe Gernow es bythkweth kyns ha Visit Cornwall a grys bos a-dro dhe dhew kans mil ha deg a havysi omma y’n eur ma. Herwydh usadow y’n seson ma, ny gevir moy es kans mil ha peswar ugens.
Yn sewyans, leun a dus yw an trethow, tegys an fordhow gans kerri ha gorveghys an servisyow yeghes gans tus shyndys po klav. Dres henna, neb unn bagas a gaskyrghoryon re wodrosas lettya an fordhow a jun Kernow dhe Bow Sows rag posleva kudynnow anedhyans leel.
Yn-medh artydh kernewek, Michael O’Donnell, “My a grys bos res hwilas strateji rag tornyaseth: py lies den a yll bos degemerys yn hwir a-berth yn Kernow seulabrys fest leun a dus? Y tal hwithra anedhyans ha towlennans. Y tal hwithra isframweyth an fordhow, kler yw nag yns i ‘vas. Ha, dell grysav, y tal gul vri a’n kerghynnedh naturel ha’gan fordh a vewnans kernewek”.
Ha Kim Conchie, esel Chi Kenwerth Kernow, a geworras, “Nebes tus a breder bos hemma kudyn hweg dh’y gavos. Mes mar vysi yw, dhe’m breus vy, may hyllir krysi agan bos anhweg, na wren ni dynerghi vysytyoryon yn ta, ha henn yw ogas ha dew-ugens kansran a’gan erbysiedh omma yn Kernow. Y tal dhyn ni gul revrons dhe’n dus ma. Y tal dhyn kavos neb digolm”.
*
Gordhyllys re beu sodhek kreslu neb a gemeras moy es kans peuns dhyworth chi person marow.
Herwydh an kreslu, an sodhek a gemeras kans peuns ha pymp dhyworth an chi “rag aga gwitha yn salow”. Byttegyns, ev a wrug devnydh a’n arghans kepar ha dell via arghans y honan ha ny wrug ev y dhaskor kyns meur a dermyn dhe bassya. Dres henna, ev a dollas sodhogyon erel a-dro dhe le may feu gwithys an arghans.
Panel keredhi a wordhellos an sodhek heb ri y hanow wosa goslowva a dhuryas dew dhydh. Yn-medh Paul Kessell, pennsodhek savonow galwesik an kreslu, “Y wriansow a godhas yn-dann savonow an fara a waytyn ni oll a sodhek kreslu, ha ny vydh godhevys an eghen a fara ma”.
*
Servis Karr Klavji Soth West re dheklaryas y fynn ev gul devnydh a eseli a’n servisyow ervys drefen y vos mar vysi y’n eur ma.
An Servis Karr Klavji a erviras gul yndella drefen ev dhe berthi gorholeth bras dres eghen a-dhia vis Me.
Leveryas a-barth an servis a dherivas bos dy’Sul, an etegves a vis Gortheren, y dhydh an moyha bysi hevlena. An jydh na, y vayni a brovias skoodhyans dhe voy es tri mil, pymp kans a hwarvedhyansow, po dre bellgowser po yn kig yn kneus.
An leveryas a geworras bos hwans dhe’n servis gul devnydh a “niver byghan” a vayni vreselek may halla moy a gerri klavji dehweles dhe’n fordhow.
*
Benyn neb eth dhe goll y’n mor orth treth Porthperan dres an penn-seythen yw passyes a veu kevys tre dy’Lun “salow ha yagh” herwydh derivas kreslu.
Dustunyoryon re welsa an venyn sedhi yn-dann donn vras mes, dell hevelis dhedha, ny wrug hi omdhiskwedhes arta.
Gwithysi Alsyow ha Gwithysi Treth a hwithras an treth ha’n mor a-dro dhe Borthperan mes heb kavos sin vyth anedhi.
Y’n gwella prys, kevys veu hi yn hy chi hy honan dy’Lun wosa hwithransow pella gans an kreslu neb a rassas dhe’n bobel a’ga gweres.
*
Yth esowgh hwi ow koslowes orth ‘An Nowodhow’ war BBC Radyo Kernow. An dowlen an seythen ma a veu skrifys ha presentys genev vy, Steve Penhaligon. An pennskrifer o Wella Morris. Bys dy’ Sul nessa, dydh da dhywgh hwi oll.
Related Content
