Baile Mòr nam Bìobhairean

Published
image copyrightGetty Images

Tha sgrùdadh ùr a' dearbhadh gu bheil bhìobhairean a' tighinn beò an cois Abhainn Tatha am meadhan baile Pheairt.

Seo a' chiad fhianais gu bheil iad air an dachaigh a dhèanamh ann am baile-mòr am Breatainn ann an ceudan de bhliadhnaichean.

Fhuaireadh comharran de na bìobhairean cuideachd air Eilean Mhoncreiffe agus air bruachan na h-aibhne ann an Innis a Tuath (North Inch).

Chuir sealgaireachd às do na beathaichean am Breatainn san 16mh Linn agus fèill mhòr ann airson a' bhèin, na feòla agus nam fàireagan fàilidh aca.

image copyrightRoisin Campbell-Palmer
image captionChunnaic luchd-sgrùdaidh ann an canùthaichean bìobhairean agus na dàmaichean aca.

Chaidh na beathaichean ath-stèidheachadh an Alba ann an 2009 ach chan ann gun chonnspaid a bha sin.

Tha cuid den bheachd gu bheil iad a' dèanamh feum dhan àrainneachd ach tha dragh air cuid de dh'uachdarain mun chron a nì iad nuair a tha iad a' togail nam dàmaichean aca.

'S e an sgrùdadh a rinn Oilthigh Exeter as leth NatureScot a' chiad fhear a rinneadh on chaidh inbhe dìon a thoirt air bìobhairean an Alba sa Chèitean 2019.

Thuirt an luchd-sgrùdaidh gun robh iad air a bhith a' fuireach air bruachan Abhainn Tatha ann am Peairt bho co-dhiù 2017, agus gun robh fianais às ùr ann gun robh àrdachadh air tighinn air na tha ann dhiubh.