Riaghailtean Covid gan teannachadh

Tha riaghailtean a thaobh biadh takeaway agus ceannach "click and collect" às na bùithdean an Alba gan teannachadh, ann an oidhirp maill a chur air sgapadh a' Choròna-bhìorais.

Cha bhi cead ach aig bùithdean a tha a' reic rudan deatamach, leithid aodach, brògan, uidheamachd leanabain, stuth dachaigh agus leabhraichean, seirbheis "click and collect" a thabhainn.

Feumaidh ge-tà, stuth a bhith air a thogail san t-suidheachadh sin a-muigh, le beàrn eadar daoine a bhith a' nochdadh.

Chan fhaod daoine a dhol am broinn àiteachan bìdhe airson takeaway a thogail no òrdugh a dhèanamh. An àite sin feumar biadh a lìbhrigeadh tro dhoras no uinneig.

"Gu math dùbhlanach"

Tha seo am measg sia riaghailtean ùra a thig a-steach aig 12:00m Disathairne.

Tha casg cuideachd ga chur air a bhith ag òl deoch-làidir air a' bhlàr a-muigh ann an sgìrean fo Ìre 4 - Tìr-Mòr na h-Alba air fad, agus cuid de na h-eileanan.

Thèid cuideachd stiùireadh reachdail fhoillseachadh do luchd-fastaidh gus taic a thoirt do dhaoine a tha ag obair aig an taigh.

"Tha an suidheachadh a tha mu ar coinneimh a thaobh a' bhìorais gu math dùbhlanach," thuirt am Prìomh Mhinisteir Nicola Sturgeon.

"Feumaidh sinn a h-uile rud as urrainn dhuinn a dhèanamh gus àireamhan chùisean a lùghdachadh - tha seo riatanach gus cuideam a thoirt far an NHS, agus airson beatha dhaoine a shàbhaladh.

"Aig an àm chritigeach agus chunnartach seo: Fuirichibh aig an taigh. Cuiribh dìon air an NHS. Sàbhailibh beatha."

Faodar stuth a cheanach le "click and collect" aig na seòrsaichean bhùithdean a leanas: