Puirt-adhair dùinte do sheirbheisean àbhaisteach

Cho-dùin Puirt-Adhair na Gàidhealtachd 's nan Eilean (HIAL) na puirt-adhair aca a dhùnadh do sheirbheisean adhair àbhaisteach.

Thuirt a' chompanaidh gun cuidicheadh sin gus dìon a chur air seirbheisean deatamach.

Bidh HIAL, a tha leis an Stàit, a' ruith nam port-adhair air feadh na Gàidhealtachd 's nan Eilean, agus cuideachd Port-Adhair Dhùn Dè.

Thig am poileasaidh ùr an gnìomh bho Dhidòmhnaich.

"Tha na coimhearsnachdan againn, gu h-àraid coimhearsnachdan eileanach, a' crochadh gu mòr air na puirt-adhair againn airson seirbheisean deatamach, agus tha sinn an-dràsta ag obair còmhla ri Còmhdhail Alba agus Loganair gus clàr-ama bunaiteach a chur air dòigh a nì cinnteach gun glèidhear na seirbheisean seo," thuirt HIAL.

"Tha na seirbheisean seo a' gabhail a-steach a bhith a' gluasad euslainteach às leth an NHS, obair a' Phuist Rìoghail agus gnìomhachas na h-ola 's a' ghas.

"Nì na manaidsearan againn cinnteach gun ruith na puirt-adhair againn mar a tha a dhìth."