Seirbhisean dìon ag ullachadh taic a thaobh a' Choròna-Bhìorais

An Coròna-Bhìoras
Image caption Tha 227 cùis dhearbhte den Choròna-Bhìoras ann an Alba.

Tha suas ri 20,000 neach bho na seirbheisean dìon gan deiseileachadh 'son a dhol an sàs air eagal 's gu bheil iad a dhìth san iomairt 'son dèiligeadh ris a' Choròna-Bhìoras.

Tha Ministearalachd an Dìon a' dùblachadh na th' aca de dhaoine a bhios deiseil airson na Poilis is seirbheisean slàinte a chuideachadh.

Tha an-còmhnaidh na mìltean shaighdearan is luchd-obrach eile bho na seirbheisean dìon deiseil na Poilis is seirbheisean eile a chuideachadh ann an suidheachaidhean èiginn.

Deiseil

Tha iad a-nise ag ràdh gu bheil iad gus am feachd a tha sin a dhùblachadh gu 20,000 duine.

Thuirt an MOD nach eil iad ach ag ullachadh mu choinneimh an t-suidheachaidh a th' ann, is nach deach iarraidh orra saighdearan a chur air na sràidean.

Ach bidh iad deiseil airosn na Poilis, na serbheisean slàinte agus seribheis nam prìosan is eile a chuideachadh.

Mar tha, tha trèanadh ga thoirt do chòrr is 100 saighdear gus tancairean ocsaidean a dhràibheadh gu ospadalan, ma tha feum air.

Tha gu leòr de dhotairean is nursaichean bho na seirbheisean dìon mar thà ag obair gus an NHS a chuideachadh.

Tha 227 cùis dhearbhte den ChorònaBbhìoras ann an Alba.