Boireannach aig an stiùir sa Chaol

Emma Noble Image copyright RNLI a' Chaoil
Image caption Emma Noble, a' chiad sgiobair boireann aig bàta-teasairginn a' Chaoil.

Tha sgiobair boireann aig bàta-teasairginn a' Chaoil airson a' chiad uair ann an eachdraidh an stèisein.

Tha Emma Noble air a bith na ball den sgioba airson grunn bhliadhnaichean.

Fhuair i fhèin agus ball eile, Anndra Dòmhnallach, tron mheasadh Diluain a leigeas leotha an stiùir a ghabhail.

Chuir Manadsair Obair Bàta-teasairgin a' Chaoil, Sandy Moireach, meala naidheachd orra.

"'S e là eachdraidheil a tha seo dhan stèistean againn leis gur e Emma a' chiad bhoireannach a chaidh na sgiobair on thòisich sinn bho chionn 30 bliadhna.

Tha Emma air a bhith ag obair gu saor-thoileach agus gu dìcheallach còmhla rinn airson iomadach bliadhna, agus bha e ceart gun do ghabh i an cothrom seo," thuirt e.