Sgoiltean na Gàidhealtachd "ann an èiginn"

Acadamaidh na Cananaich Image copyright Richard Dorrell / Geograph
Image caption Thàinig an rabhadh bho cheannard Acadamaidh na Cananaich.

Nochd rabhadh gu bheil sgoiltean na Gàidhealtachd ann an staid-èiginn agus gum bris tuilleadh ghearraidhean an siostam buileach.

Thàinig an teachdaireachd bho cheannard Acadamaidh na Cananaich anns an Eilean Dubh, Donaidh MacCoinnich.

Ged a tharraing Comhairle na Gàidhealtachd cuid de na gearraidhean a bha san amharc aca airson roinn an fhoghlaim, tha iad fhathast a' coimhead ri timcheall air 40 tidsear àrd-sgoile a ghearradh.

Ann an litir gu pàrantan, tha Mgr MacCoinnich ag ràdh gu bheil sgoiltean na Gàidhealtachd uile ann an staid-èiginn mar-thà.

Dh'innis e gu bheil e a' tuigsinn gu bheil dùbhlan "cha mhòr do-dhèanta" aig Comhairle na Gàidhealtachd sàbhalaidhean a bharrachd a dhèanamh.

Sgrios

Thuirt e ge-tà, gun rachadh an siostam às a chèile buileach nan rachadh na gearraidhean seo a chur an sàs.

Bhiodh a' bhuaidh cho mòr air Acadamaidh na Cananaich, thuirt e, is gum feumadh iad cuspairean a leigeil seachad.

'S dòcha gum feumadh iad sguir de dheuchainnean Sàr Àrd Ìre buileach, 's bhiodh amannan ann nuair a dh'fheumadh iad sgoilearan a chur dhachaigh.

Thuirt Mgr MacCoinnich gum fàgadh na gearraidhean seo sgoilearan na Gàidhealtachd air dheireadh air an co-aoisean air feadh na h-Alba.

Thog e dragh cuideachd mun bhuaidh air slàinte an luchd-obrach.

Tha Comann Cheannardan-Sgoile na Gàidhealtachd air sgrìobhadh gu gach comhairliche, a' cur nan sùilean an call a dhèanadh leithid de ghearraidhean.

Tuilleadh air an sgeulachd seo

Duilleagan Eadar-lìn co-cheangailte

Chan eil uallach air a' BhBC son na tha air làraichean-lìn eile