Òraidichean colaiste air stailc

Air fhoillseachadh

Tha dùil gun toir stailc le òraidichean colaiste buaidh air oileanaich air feadh Alba Diardaoin.

Tha aonadh an EIS a' gearain gu bheil beàrn mhòr ann eadar ìrean-pàighidh aig diofar cholaistean, agus nach deach aonta a chaidh a dhèanamh an-uiridh airson sin a leasachadh a chur an sàs.

Thàinig còmhraidhean a bha ag amas air rèite a ruighinn gu ceann Dihaoine, gun aonta.

Thuirt Oilthigh na Gàidhealtachd agus nan Eilean gur ann air na colaistean aca ann an Inbhir Nis, Steòrnabhagh, Inbhir Ùige, Eilginn agus Peairt a bhios a' bhuaidh as motha.

"Briseadh-dùil"

Thuirt buidheann-riochdachaidh nan colaistean gu bheil e na fhìor bhriseadh-duil dhaibh gun tèid an stailc air adhart.

Thuirt Rùnaire an EIS, Larry Flangagan, ge-tà, gu bheil òraidichean air a bhith a' feitheamh gu foighidneach fad bliadhna, agus nach robh iad ag iarraidh ach gun deadh na chaidh a ghealltainn dhaibh a choileanadh.

Mura tèid aonta a ruighinn, tha dùil ri barrachd stailcean bhon ath-sheachdain.

Ceanglaichean Eadar-lìn Dàimheil

Chan eil am BBC an urra ri na tha air Làraichean-lìn air an taobh a-muigh