Iomairt mu ghluasad ola eadar bàtaichean

Cromarty Rising a' togail fianais air Traigh Inbhir Narann san Dùbhlachd. Image copyright Rowena Cameron
Image caption Thog a' bhuidheann fianais air Traigh Inbhir Narann air a' mhìos a chaidh.

Bidh luchd-iomairt far Ghàidhealtachd ann an Dùn Èideann Diardaoin a' togail fianais aig Pàrlamaid na h-Alba an aghaidh nam planaichean 'son faisg air naoi millean tunna de dh'ola a ghluasad bho bhàta gu bàta ann an Linne Mhoireibh.

Tha dragh air a' bhuidhinn-iomairt, Cromarty Rising, gun tèid cron a dhèanamh air an àrainneachd nam biodh tubaist ann.

Tha leumadairean biorach, mucan-mara minceach agus peileagan ri fhaighinn anns an linne.

Ach, tha Ùghdarras Caladh Chrombaigh, a tha air cùl nam planaichean, ag ràdh gu bheil modhanan-obrach ann an àite 'son stad a chur air ola bho a bhith ag aodion air mhearachd agus nach eil mòran chunnart ann idir gum bi dòrtadh ola ann.

Tha cead aig an ùghdarras mar thà ola a ghluasad eadar soithichean a tha ceangailte aig a' chidhe aig làrach Bhàgh an Eige.

Taic phoblach

Togaidh buill bho Chromarty Rising fianais taobh a-muigh Holyrood eadar 11:30m agus 2:30f.

Bidh Des Scholes bho Inbhir Narann nam measg agus tha e ag ràdh gu bheil iad ag iarraidh air Riaghaltas na h-Alba taic phoblach a thoirt dhan iomairt aca.

"Bu toil leinn nam biodh deasbad sa Phàrlamaid, coltach ris an deasbad a bh' ann ann an 2009 nuair a bha an aon rud a' tachairt ann an Linne Fhoirthe.

"Aig an àm a bha sin bha Ridseard Lochhead gu mòr an aghaidh a bhith a' gluasad ola bho bhàta gu bàta agus leis gu bheil esan na Bhall-Pàrlamaid ann am Moireibh tha sinn airson beagan a bharrachd fhaicinn bhuaithe-san cuideachd," thuirt Mgr Scholes.

Ceist chudromach

'S ann aig Riaghaltas Westminster, ge-ta, a tha am facal mu dheireadh mun chùis leis gur ann bhuapa-san a thigeadh cead airson na h-obrach.

Ach, tha Cromarty Rising a' togail fianais aig Holyrood leis gu bheil Buidheann-mara na h-Alba nan luchd-comhairleachaidh reachdail air gnothaichean leithid seo.

A rèir Mhgr Scholes cha deach a' bhuidheann an sàs sa phròiseas idir nuair a chuir Ùghdarras Caladh Chrombaigh iarrtas a-steach an toiseach.

"'S e ceist eile a tha sin, ceist chudromach a tha sin.

"Agus an turas seo nuair a thèid an t-ùghdarras leis an iarrtas aca tha sinn ag iarraidh air Buidheann-mara na h-Alba rud gu math làidir a chur a-steach an aghaidh a bhith a' gluasad ola bho shoitheach gu soitheach," thuirt Mgr Scholes.