Cùis an Transocean Winner ga sgrùdadh

  • Air fhoillseachadh
An Transocean Winner air bòrd an Hawk
Fo-thiotal an deilbh,
Dh'fhàg an Transocean Winner Leòdhas anns an Dàmhair

Gabhaidh Comataidh Thaghte na Còmhdhail ann an Westminster fianais Diluain mu chùis an Transocean Winner a chaidh air na creagan air taobh siar Leòdhais anns an Lùnastal.

Bha an clàr, anns an robh 17,000 tunna cuideim, ga shlaodadh dhan Tuirc nuair a bhris an loidhne a bha ga cheangal ris a' bhàta-slaodaidh.

Às dèidh iomairt mhòr, dh'fhàg an clàr Leòdhas anns an Dàmhair.

Truailleadh

Bha dragh mòr ann aig toiseach gnothaich mu thruailleadh agus bidh mar a chaidh dèiligeadh ris a' chunnart sin a-measg nan cuspairean ris am bi a' chomataidh a' coimhead.

Tha an fheadhainn a tha a' strì airson bàta-slaodaidh a stèidheachadh às ùr air taobh siar na h-Alba ag ràdh gu bheil na thachair leis an Transocean Winner a' neartachadh na h-argamaid sin.

Bidh Riochdaire Rùnaire na Stàit airson Saoradh Mara, Ùisdean Seathach, agus Stiùiriche Transocean Dave Wells a-measg na bheir fianais seachad.