Bàs càraid an Leòdhas ga rannsachadh

Air fhoillseachadh
Fo-thiotal an deilbh,
Bha an cupall a' ruith Oifis a' Phuist ann an Grabhair

Tha rannsachadh a' leantainn anns na h-Eileanan an Iar às dèidh mar a fhuairear càraid phòsda marbh ann an Grabhair ann an Ceann a Deas nan Loch ann an Leòdhas madainn Dihaoine.

Chaidh na cuirp a lorg taobh a-muigh an taighe aca.

Chaidh an ainmeachadh mar Dhòmhnall Mac a' Mhaoilein, 73, agus Mòrag Nic a' Mhaoilein, 67.

Bha an dithis a' ruith oifis puist a' bhaile.

Daoine còir

Thathas a' tuigsinn gur ann tràth madainn Dihaoine a fhuair na poilis fios gun d'fhuaireadh an dithis taobh a-muigh an taighe.

Tha an naidheachd dhuilich air uamhas a chur air muinntir na sgìre.

Thuirt Murchadh MacIllinnein, a tha na èildear san Eaglais Shaoir, gur e daoine còir, càirdeal a bh' annta agus an dithis an sàs gu mòr anns a' choimhearsnachd.

"Bhiodh Dòmhnall a' fosgladh na h-eaglaise air an t-Sàbaid, air an deireadh sheachdain ... duine as am b'urrainn dhut a bhith earbsach".

"S e bha coimhead às dèidh a' chlaidh, na h-ainmean aige ceart, is òrdugh brèagha aige air a h-uile càil".

Cha chan na Poilis ach gur e bàs obann a bh'ann agus nach eil càil a dh'fhios aca dè a dh'adhbhraich am bàs.

Tha luchd-rannsachaidh forensic à Tir-Mòr an sàs anns an rannsachadh.

Ceanglaichean Eadar-lìn Dàimheil

Chan eil am BBC an urra ri na tha air Làraichean-lìn air an taobh a-muigh