Leasachadh Inbhir Nis gus tòiseachadh

Tòisichidh leasachadh £13m aig Pàirce Bhùithdean Inbhir Nis an ath-sheachdain.

Tha trì companaidhean mòra gus taighean-bìdhe fhosgladh sa phàirce.

'S iad Nando's, Frankie and Benny's agus companaidh eile nach deach ainmeachadh gu poblach fhathast.

Thèid an làrach a bh' aig Comet a ghearradh ann an trì pàirtean gus àite a dhèanamh airson an leasachaidh.

Obraichean

Thuirt ceannardan na Pàirce gun tèid 180 dreuchd làn is pàirt-ùine a chruthachadh.

Thuirt iad gu bheil iad an dòchas gum bi obraichean ann gu h-àraidh do dh'oileanaich, is an leasachadh faisg air làrach ùr Colaiste Inbhir Nis.

Mar phàirt den obair, thèid cuideachd slighean nas fheàrr a-steach dhan phàirce a thogail do chàraichean is baidhsagalan, is barrachd àitean-pàircidh.

Thathas an dùil gum bi dhà de na taighean-bìdhe fosgailte aig an Nollaig.