Stiùidio
Cha chluich seo air an uidheamachd agaibh

Naidheachdan 11:00m

6 An Giblean 2016 Ùraichte aig Ùraichte aig

Tinneas an t-Siucair

Tha tinneas an t-siucair air a' cheithir uimhir a bhararchd de dh'inbhich an-diugh na ann an 1980. Bha còrr air 400m neach a' fulang leis a' bhòn-uiridh, a rèir Buidheann Slàinte na Cruinne. Thuirt iad gu bheil e a' sgaoileadh le atharrachaidhean ann am biadh, bith-beò, agus gluasad dhaoine, agus e a-niste air faisg air 9% de shluagh an t-saoghail, a rèir na buidhne.

Eaconamaidh na h-Alba

Dh'fhàs eaconamaidh na h-Alba 0.2% anns na trì mìosan mu dheireadh den bhliadhna an-uiridh. Chan eil an sin ach leth den ìre fhàis a bh' anns an Rìoghachd Aonaichte uile gu lèir. Ach tha e a' ciallachadh gun do dh'fhàs eaconamaidh na h-Alba 0.9% thairis air a' bhliadhna an-uiridh san fharsainneachd.

Pàipearan Phanama

Dh'iarr ball Làbarach de Chomataidh Ionmhais na Pàrlamaid, Wes Streeting, air Dàibhidh Camshron innse an d' fhuair e riamh buannachd à cunntasan airgid thall-thairis. Chaidh athair a' Phrìomhaire ainmeachadh ann am Pàipearan Phanama - pàipearan a chaidh ma sgaoil a' foillseachadh fiosrachaidh mu chunntasan thall-thairis air feadh na Cruinne. Thuirt neach-labhairt a' Phrìomhaire tà, nach biodh buannachd ann dha fhèin, a bhean no a chlann bhon leithid de chunntasan san àm ri teachd.

Gràin-cinnidh

Chaidh casaidean a chur ro sheann chomhairlichen Nàiseantach ann an Dùn Dè às dèidh dha teachdaireachdan fòna gràin-cinnidheil a chur gu boireannach a bha ag obair còmhla ris, a rèir aithrisean. Chaidh Craig Melville a chur às an SNP rè ùine nuair a thàinig na casaidean am follais. Thèid aithisg mun chùis gu Neach-Casaid a' Chrùin.

Croitearachd

Thuirt Caidreachas Croitearachd na h-Alba gu bheil na buill aca air rabhadh fhaighinn bhon Riaghaltas gu bheil barrachd dhaoine na bha dùil aca air taic-airgid nan caorach iarraidh. Tha an Caidreachas agus mòran chroitearan iomagaineach gum bi sin a' ciallachadh nas lugha de dh'airgead dha croitearan a dh'iarr e. Thuirt Leas-Chathraiche na buidhne, Russell Mac a' Ghobhainn, gun dèanadh mì-chinnt an lùib sin cron air croitearachd.

Uachdarain Phrìobhaideach

Tha cuid le taighean air màl prìobhaideach ann an Alba gam bagairt agus gam burraidheachd le an uachdarain ma nì iad gearain orra, a rèir Seirbheis Chomhairleachaidh a' Phobaill. Ann an aithisg ùir thuirt an t-seirbheis gun do chuir 6,000 duine fios orra an-uiridh 's iad mì-thoilichte le an dachannan màil, no le an uachdarain. Ach thuirt Comann Uachdaran na h-Alba gun robh còir ann na riaghailtean a th' ann mar thà a chleachdadh ceart.