Stiùidio
Cha chluich seo air an uidheamachd agaibh

Naidheachdan 11:00m

28 Am Màrt 2016 Ùraichte aig Ùraichte aig

Stoirm

Tha droch shìde a' toirt buaidh air mòran de cheann a deas Shasainn agus pàirtean den Chuimrigh. Chuir a' ghaoth làidir maill air seirbheisean aig Port-adhair Heathrow agus aig Gatwick. Tha drochaidean dùinte agus chaill faisg air 20,000 dachaigh an dealan.

Lahore

Thuirt buidheann a bhris air falbh bhon Taliban gur iadsan a bh' air cùlaibh na h-ionnsaigh anns an deach còrr is 70 duine a mharbhadh ann an Lahore ann am Pagastan an-dè. Bha an spreadhadh fèin-mhairbhteach faisg air raon-cluiche, agus b' e clann a bh' ann am mòran de na chaill am beatha. Dh'aidich na ceannaircich gun robh iad ag amas air Crìosdaidhean a bha a' comharrachadh na Càisge.

Siria

Thuirt an t-arm ann an Siria gun cleachd iad baile Palmyra mar làrach às an leudaich iad an iomairt an aghaidh na Stàite Ioslamaich. Ghabh feachdan an Riahgaltais smachd an-dè air a' bhaile a th' air a bhith ann an làmhan IS bho chionn faisg air bliadhna.

A' Bhruiseil

Tha Mèar na Bruiseil a' fàgail air ùghdarrasan feadaralach na Beilge nach do rinn iad gu leòr airson stad a chur air buidhinn bhon fhìor-làimh dheis a rinn buaireadh anns a' bhaile an-dè. Thug a' bhuidheann an aghaidh air sluagh a bh' air cruinneachadh a chur cuimhne air na chaill am beatha sa cheannairc a bha sa bhaile an t-seachdain seo chaidh.

Mìcheal Ros

Tha luchd-iomairt a tha ag iarraidh saorsa do Mhìcheal Ros a chaidh a dhiteadh airson muirt ag ràdh gu bheil dearbhadh aca gun do chaill na Poilis pìos fianais chudromaich. Chaidh Mìcheal Ros fhaighinn ciontach ann an 2008 fo chasaid gur e a mhuirt Shamsudden Mahmood ann an taigh-bìdhe Ìnnseannach ann an Arcaibh 14 bliadhna rona sin. Tha a' bhuidheann Justice for Michael Ross, a chuir làrach air bhonn air an eadar-lìon air an deireadh-sheachdain, a' cumail a-mach gun do chaill na Poilis leabhar-là a bhuineadh do Shamsudden Mahmood.

Malaig

Dh'innis Caledonian Mac a' Bhriuthainn gum bi seirbheis bus a' coinneachadh ris an t-seirbheis aiseig ùir eadar Loch Baghasdail agus Malaig. Thuirt iad gu bheil Busaichean Seile air aontachadh uair a' bhus à Malaig dhan Ghearasdan atharrachadh. Bidh seirbheis ùr ann cuideachd eadar an Gearasdan agus Malaig feasgar a leigeas le daoine aiseag an fheasgair fhaighinn air ais a Loch Baghasdail.