Dragh mu bhancaichean an Cataibh

Air fhoillseachadh
fo-thiotal a’ bhidioUairean gan gearradh

Nochd dragh mu ghearradh ann an uairean fosglaidh ann an cuid de bhancaichean air a' Ghàidhealtachd.

Tha gearain gu h-àraidh air taobh sear Chataibh far a bheil gearradh mòr air na h-uairean aig Banca na h-Alba ann an Dòrnach, Bun Illidh agus Drochaid a' Bhanna.

Cha bhi Banca na h-Alba ann an Drochaid a' Bhanna fosgailte ach aon là san t-seachdain, Dimàirt, 'son còig uairean de thìde.

Tha cuid droch-amharasach mun ghluasad.

"Tha mise a' faicinn gu bheil iad a' gearradh nan uairean is le na h-uairean a bhith air an gearradh, cha bhi na h-uimhir de dhaoine a' dol a-steach dhan àite", thuirt Tormod Iain Dòmhnallach, a tha a' fuireach ann an Drochaid a' Bhanna.

Dùnadh

"An ath-rud a chanas iad, 'chan eil duine a' dol a-steach dhan bhanca, tha sinn a' dùnadh a' bhanca uile gu lèir', is caillaidh sinn an aon là.

Dh'aidich Mgr Dòmhnallach nach eil am baile cho trang a-nise nach eil an rathad mòr a' dol troimhe.

Thuirt e ge-tà, gu bheil feum fhathast air goireasan bancaidh.

"Tha airgead sa bhaile agus sa choimhearsnachd fhathast a dh'fheumas na seirbheisean seo a chumail a' dol airson dà là den t-seachdain", thuirt e.

Nochd draghan cuideachd ann an Dòrnach.

"Buille mhòr"

"Bidh e na bhuille mhòr", thuirt an t-Urr. Donnchadh MacLeòid ann an Dòrnach.

"S e an aon bhanca a th' againn sa bhaile agus tha tòrr ga fhrithealadh, chan ann a-mhàin à Dòrnach fhèin ach às na bailtean beaga mun cuairt,

"Chan eil e furasta dhaibhsan faighinn a-steach a Dhòrnach a h-uile là, gu h-àraidh daoine a tha a-nise caran aosta", thuirt e.

Thuirt Mgr MacLeòid gu bheil an t-atharrachadh na chomharra air dìth spèis aig na h-ùghdarrasan san fharsaingeachd dha sgìrean iomallach.

Dh'fhàg e air Riaghaltas na h-Alba gu bheil iad a' feuchainn ri cumhachd a chumail ann am meadhan na dùthcha.

Thuirt Banca na h-Alba gu bheil iad daonnan a' cumail sùil air an t-seirbheis a tha iad a' toirt dhan choimhearachd, agus nach eil gearradh sam bith a' tachairt gun fìor mheòireachaidh a dhèanamh air a' chùis ro-làimh.

Ceanglaichean Eadar-lìn Dàimheil

Chan eil am BBC an urra ri na tha air Làraichean-lìn air an taobh a-muigh