Iasgairean mì-laghail an grèim

Caol Diùra Image copyright Undiscovered Scotland
Image caption Chan eil uisge Chaol Diùra air a mheasadh fhathast feuch co-dhiù tha am maorach a th' ann aig ìre airson ithe gu sàbhailte.

Chaidh soitheach a bha ri iasgach a' mhuirsgein gu mì-laghail a chur an grèim ann an Caol Diùra.

Dh'fhaodadh càin suas ri £10,000 a dhol air sgiobair a' bhàta, a bha ri iasgach le dòighean mì-laghail ann an uisge far nach fhaodar maorach a ghlacadh.

Chan eil cead maorach a thogail ann an Caol Diùra, ri linn 's nach deach an t-uisge a mheasadh fhathast feuch co-dhiù tha am maorach a th' ann sàbhailte.

Chaidh fios air na h-ùghdarrasan gur dòcha gun robh soitheach a' togail mhuirsgean ann air an t-seachdain seo chaidh, agus chaidh oifigearan air bòrd an t-soithich.

Goirid mus deach iad air bòrd, thilg an criutha uidheamachd iasgaich mhì-laghail, a bhios a' cur ghathan dealain tron uisge gus an t-iasg a mharbhadh, thar-bòrd.

Chaidh an uidheamachd a thogail le dàibhearan an dèidh làimh, agus thèid a sgrios.

Chaidh luchd mhuirsgean luach £750 ann an Alba - ach luach timcheall air £4,000 ann an Àisia - a chur an grèim cuideachd, agus thèid sin a sgrios le Roinn na Slàinte Àrainneachail aig Comhairle Earra-Ghàidheal is Bhòid.

Thuirt Rùnaire an Iasgaich, Ridseard Lochhead: "Tha cliù eadar-nàiseanta aig maorach na h-Alba airson blas agus càilleachd.

"Tha fèill air a' mhuirsgean againn gu h-àraid ann an Àisia, agus tha e riatanach nach millear an cliù seo le maroach nach eil aig ìre," thuirt e.