Nick Ross gu Dùn Dè

Air fhoillseachadh
Tùs an deilbh, Dundee FC
Fo-thiotal an deilbh, Tha Nick Ross air cùmhnant dà bhliadhna aontachadh le Dùn Dè.

Tha Nick Ross air Caledonian Thistle Inbhir Nis fhàgail is e air ainm a chur ri cùmhnant dà bhliadhna còmhla ri Dùn Dè.

Rugadh is thogadh Ross, 23, ann an Inbhir Nis is nochd e an toiseach sa chiad sgioba aig Caley Thistle an uair nach robh e ach 17.

Chluich e còrr is 150 geama ann am meadhan na pàirce dhan chluba bhon uair sin is thàinig e far na beingidh an uair a bhuannaich iad Cupa na h-Alba air a' mhìos a chaidh.

Dùbhlan ùr

Bha Ross tric air a' bheingidh san t-seusan a dh'fhalbh is ged a bha sgioba Inbhir Nis air cùmhnant ùr a thabhainn dha, cha bhi e na iongadh do mhòran gu bheil e air co-dhùnadh dùbhlan ùr a chur roimhe aig Pàirce Dens.

'S e Ross an ochdamh cluicheadair ùr a tha Pòl Hartley air a thoirt gu Dùn Dè anns an t-Samhradh seo.

'S e Nat Wedderburn bho Chowdenbeath an aon aodann ùr aig Caley Thistle aig an ìre seo is bidh Iain Hughes ag amas air an sgioba a neartachadh is seusan ùr air faire.

Ceanglaichean Eadar-lìn Dàimheil

Chan eil am BBC an urra ri na tha air Làraichean-lìn air an taobh a-muigh