Cead-craolaidh ùr do Chuillin FM

Air fhoillseachadh
fo-thiotal an deilbhThòisich an stèisean a' craoladh ann an 2004

Tha an stèisean rèidio Cuillin FM anns an Eilean Sgitheanach ag ullachadh tagraidh an-drasta airson an dàrna chead-craolaidh aca.

Thòisich an stèisean choimhearsnachd a' craoladh ann an 2004, agus thig a' chiad chead-craolaidh aca gu ceann an ath-bhliadhna.

Feumaidh iad iarrtas airson an dàrna chead-craoladh aca, a mhaireas 12 bliadhna eile, a chuir gu Riaghladair a' Chonaltraidh, Ofcom ro Dhimàirt sa tighinn.

Tha còrr is 40 duine an sàs anns an stèisean - agus 's ann gu saor-thoileach a tha a' mhòr-chuid dhiubh sin ag obair.

Co-obrachadh

'S e Ruaraidh MacCarmaig fear dhen na còrr is 28 duine a tha a' preasantadh phrògraman 's e ag ràdh gu bheil co-obrachadh math a' dol aig an stèisean.

"Bha na h-uiread de phreasantairean cho deònach a bhith a' tighinn a-steach gu saor-thoileach agus a' lìonadh a' chlàir-chraolaidh gach seachdainn le prògraman agus ma bha duine tinn neo air falbh airson na seachdainn bhiodh daoine a' tighinn a-steach agus bhiodh iad a' dèanamh a' phrògraim sin dhaibh".

"Tha sinn ag iarraidh a' cheangail làidir sin a thogail 's chan eil sinn ag iarraidh sin a chall anns na bliadhnaichean ri thighinn".

Tha £6000 a dhìth orra fhathast airson a' chead ùir 's iad trang ga chruinneachadh.

Thèid cuirm-ciùil a chumail ann an oidhirp cuid dhen na tha a dhìth a thional.

A-measg eile bidh Cuillin FM a' craoladh beò bho gheamaichean iomain air an eilean, agus tha Ruaraidh MacCarmaig ag ràdh gur e call mòr a bhiodh ann nan deigheadh an t-seirbheis a chall.

"Tha tòrr dhaoine ag ag iarraidh fiosrachaidh, tha tòrr dhaoine ag iarraidh ceòl a chluinntinn agus, nam bheachd-sa, dè bhiodh sin a' dèanamh às aonais stèisean ionadail? 'S e call air leth a bhiodh ann".

Ceanglaichean Eadar-lìn Dàimheil

Chan eil am BBC an urra ri na tha air Làraichean-lìn air an taobh a-muigh