Stiùidio
Cha chluich seo air an uidheamachd agaibh

Naidheachdan 11:00m

18 An Cèitean 2015 Ùraichte aig Ùraichte aig

Unite

Tha an t-aonadh as motha ann am Breatainn, Unite, ag ullachadh airson deasbad aig a' cho-labhairt anns an Iuchar air cur às dha na ceanglaichean eachdraidheil ris a' Phàrtaidh Làbaraich. Thuirt Àrd-Rùnaire Unite, Len McCluskey, gum faodadh iad sguir den taic-airgid dhan phàrtaidh mura bi iad riaraichte le cò ceannard ùr nan Làbarach. Thuirt Ceannard eadar-amail nan Làbarach, Harriet Harman, an-diugh nach eil gnothach aig na h-aonaidhean ri cò an ceannard ùr a bhios ann.

An Stàit Ioslamach

Ghabh feachdan na Stàite Ioslamaich smachd air baile Ramadi ann an Iorac an dèidh blàir mhòir. Thuirt Riaghaltas Iorac gu bheil feachdan an Riaghaltais air tarraing a-mach à Ramadi, agus gu bheil iad a-niste ag iarraidh taic nam mailisi Shi'ia, le cuideachadh bho Ioran airson feuchainn ris a' bhaile a ghabhail air ais bho IS.

Luchd-Imrich

Tha dithis de dh'àrd-mhinistearan Riaghaltas na Rìoghachd Aonaichte aig coinneimh anns a' Bhruiseil an-diugh far a bheil dùil gun aontaich an t-Aonadh Eòrpach ri feachdan armaichte a chur an sàs airson stad a chur air fògaraich mhì-laghail. Tha dùil gun gabh an AE ri feachdan armaichte airson cur às dha na bàtaichean a bhuineas dha na gràisgean a tha a' cur luchd-imrich gu mì-laghail à Afraga air a' Mhuir Mheadhan-Thìrich.

Trident

Thuirt maraiche a theich an dèidh a bhith ag ràdh gur e "tubaist a' feitheamh ri tachairt" a th' ann an siostam dìon Trident gun gèill e ris na h-ùghdarrasan an ceann là no dhà. Thuirt Uilleam McNeilly gu bheil laigsean tèarainteachd agus sàbhailteachd air na bàtaichean-aigeann niuclasach, a tha stèidhichte aig Faslann air Linne Chluaidh. Chaidh an Cabhlach Rìoghail às àicheadh na thuirt e, agus thuirt iad gu bheil iad ag obair còmhla ris na Poilis airson a lorg.

Aiseag Steòrnabhaigh

Thòisich seirbheis aiseig do charbadan eadar Steòrnabhagh agus Ulapul às ùr anns a' mhadainn an-diugh an dèidh leasachadh air Cidhe Ulapuil. Tha an t-alt-aiseig a-niste comasach air gabhail ris an Loch Seaforth - am bàta ùr a th' ann an àite an Isle of Lewis.

Àrd-Sgoil Bhàgh a' Chaisteil

Tha pàrantan ann am Barraigh a' gearain mu dhìth luchd-teagaisg aig Àrd-Sgoil Bhàgh a' Chaisteil. Tha iad a' cumail a-mach gun robh a' Chomhairle slaodach a' cur luchd-teagaisg an àite luchd-obrach a bha dheth tinn. Thuirt fear-labhairt do Chomhairle nan Eilean Siar gun robh àireamh thidsearan a bha a' teagaisg chuspairean bunaideach ann an Sgoil Bhàgh a' Chaisteil air a bhith dheth air an teirm seo, ach gun do chum tidsearan eile bhon sgoil na clasaichean seo, agus tidsearan eile bho thaobh a-muigh.