Beachdan gan sireadh mu sheirbheisean aiseig

Image caption Tòisichidh coinneamhan Chal Mac an t-seachdain seo tighinn ann an Colbhasa.

Tha a' chompanaidh aiseig Caledonian Mac a' Bhriuthainn a' gabhail cuairt air feadh a' chosta an iar 's iad a' sireadh bheachdan mu na seirbheisean aca agus mar a ghabhas piseach a thoirt orra.

Cumaidh iad 24 coinneamh phoblach ann am puirt air Tìr-Mòr, le còrr is dusan eile anns na h-eileanan.

Tha a' chompanaidh ag ràdh gur e seo an co-chomhairleachadh as motha a rinn iad bho fhuair iad cùmhnant nan seirbheisean aiseig ann an 2007.

'S ann ann an 2016 a thig an cùmhnant sin gu ceann.

Tha am pròiseas mar-thà air tòiseachadh airson taghadh cò gheibh an ath-chùmhnant, a mhaireas ochd bliadhna.

"Strì làidir"

Thuirt Àrd-Oifigear Chal Mac, Màrtainn Dorchester, gum biodh iad a' dèanamh strì làidir airson an cùmhnant a ghlèidheadh, agus gur e sin a tha a' toirt orra beachdan iarraidh bho luchd-cleachdaidh nan seirbheisean leis gur iad an fheadhainn as eòlaiche orra.

Bheir na beachdan a chluinneas iad, thuirt e, buaidh air an tagradh a chuireas iad a-steach airson na seirbheisean a ruith.

Bidh a' chiad choinneamh aca ann an Colbhasa air an 18mh là den Chèitean, leis a' chuairt a' crìochnachadh anns na h-Eileanan Beaga air a' 5mh là den Òg-mhìos,