Uard eile dùinte aig an Ràthaig Mhòr

Air fhoillseachadh
Fo-thiotal an deilbh,
Tha trì uardan a-nise dùinte do dh'euslaintich ùra.

Chaidh an treas uard a dhùnadh aig Ospadal an Ràthaig Mhòir ann an Inbhir Nis agus Noro-Bhìoras ma sgaoil.

Thàinig air Bòrd-Slàinte na Gàidhealtachd mar thà uardan a 2C agus 7C a dhùnadh do dh'euslaintich ùra is 26 duine a' fulang leis a' ghalar.

Dhearbh am Bòrd-Slàinte gu bheil Uard 5C cuideachd a-nise dùinte do dh'euslaintich ùra is comharraidhean Noro-Bhìorais air nochdadh ann.

Dh'iarr iad air daoine gun tadhal air na uardan idir idir ach ma tha e fìor dheatamach.

Bu chòir dhaibh fònadh dhan ospadal an toiseach ma tha iad den bheachd gum feum iad tadhal air na uardan.

Dh'iarr am Bòrd Slàinte cuideachd air daoine fuireach air falbh bhon ospadal ma tha iad fhèin, neo cuideigin a bha a' fuireach còmhla riutha, air a bhith a' dìobhairt neo leis a' bhuinnich anns an dà là mu dheireadh.

Ceanglaichean Eadar-lìn Dàimheil

Chan eil am BBC an urra ri na tha air Làraichean-lìn air an taobh a-muigh