Cunnart maoime-sneachda do cheathrar fhireannach

Na fir a' coimhead Image copyright SAIS Creag Meagaidh
Image caption Tha barramhaisean sneachda fhathast a' crochadh, le cunnart gun tuit iad ri linn blàths na grèine.

Chaidh dà bhuidhinn de dh'fhireannach a chàineadh an dèidh dhaibh a dhol a dh'fhaicinn sprùillich bho mhaoim-sneahda gun ach aodach samhraidh orra.

Bha cunnart ann aig an àm gun tigeadh tuilleadh sneachda a-nuas ri linn cho blàth 's a tha an aimsir air a bhith.

Rinn seirbheis fiosrachaidh nam maoimtean-sneachda cuideachd càineadh air dithis eile a chaidh chun na làraich.

Bhathas ag ràdh aig an àm gun robh a' mhaoim-sneachda, a thachair air Creag Meagaidh sa Ghearran, mòr gu leòr airson càr a chur fodha.

Tha an sprùilleach ann fhathast.

Goirid ro dheireadh-seachdain na Càisge, chuir Comhairle Sreap na h-Alba rabhadh làidir a-mach, ag iarraidh air daoine aig nach eil fiosrachadh agus uidheamachd cheart gun a dhol faisg air na beanntan as àirde.

Tha iad ag ràdh gu bheil cho blàth 's a tha an aimsir air a bhith o chionn ghoirid a' fàgail cunnart gun tig tuilleadh mhaoimtean.

A-niste, ann am blog, rinn fear a tha ag obair don Sheirbheis Fiosrachaidh nam Maoimtean-Sneachda, càineadh air dà bhuidhinn de dhithis fhireannach a chaidh faisg air an làraich, far an robh barramhaisean sneachda fhathast a' crochadh.

Thuirt e gun robh a' chiad dithis air bùird-shneachda gun ach aodach samhraidh orra - briogais ghoirid, brògan aotrom agus hudaidh - leis an dàrna buidheann ann an aodach nas fheàrr, ach fhathast le jeans.

Thuirt e gun robh an deagh aimsir agus cho furasta 's a tha e faighinn chun na beinne bhon raon-phàrcaidh, air "daoine gun eòlas beinne" a thàladh ann.