Iomairt Ospadal Phort Rìgh a' leantainn

Tha an luchd-iomairt a' cumail a-mach gu bheil e riatanach seirbheisean ann an Ospadal Phort Rìgh a ghlèidheadh

Tha còrr is 1000 duine air an ainm a chuir ri athchuinge a tha ag iarraidh air Riaghaltas na h-Alba Ospadal Phort Rìgh a ghlèidheadh 's gun ach beagan làithean ann bho thòisich e.

'S e a' bhuidheann-iomairt NHS SOS a thòisich an athchuinge agus iad dhen bheachd gun do rinn NHS na Gàidhealtachd mearachd ann a bhith a' moladh Ospadal Phort Rìgh a dhèanamh na ionad meidigeach gun leapannan.

Chailleadh an ceann a tuath cuideachd goireasan èiginn 's ospadal ùr gu bhith air a thogail anns an Ath Leathann.

Tha luchd-iomairt a tha a' strì airson seirbheisean ann an ceann a tuath an eilein a dhìon ag ràdh gum faodadh an t-atharrachadh beatha dhaoine a chuir ann an cunnart.

Co-dhùnadh dèanta?

Thuirt Neilian Mhoireach bhon bhuidhinn-iomairt nach eil iad idir a' gabhail ris gu bheil an gnothach seachad, ged a cho-dhùin Comhairle Mheidigeach na h-Alba gu robh pròiseas NHS na Gàidhealtachd cothromach 's laghail.

Chaidh cead cuideachd a thoirt seachad le Rùnaire na Slàinte, Shona Robison.

Tha an luchd-iomairt ag ràdh nach ann idir a' feuchainn ri seirbheisean slàinte a thoirt air falbh bho mhuinntir cheann a deas an Eilein Sgitheanaich a tha iad.

"Chan eil sinn ag iarraidh seirbheisean sam bith a thoirt air falbh bho mhuinntir cheann a deas an eilein, tha sinn làn chinnteach gu bheil iad-san a' cheart cho feumach 's a' cheart cho airidh air seirbheisean slàinte 's a tha sinne. 'S e a tha sinn a' coimhead air a shon ach seirbheis slàinte a bhios freagarrach agus iomchaidh dha muinntir an eilein agus ceann a deas Rois gu lèir" thuirt Neilian Mhoireach.

Tha a' bhuidheann-iomairt cuideachd a' sireadh chomhairle mu ath-bhreithneachadh laghail mun dòigh anns an deach a' chùis a làimhseachadh.