Na mìltean chraobhan gan leagail taobh an A82

Rocks on A82 near Invermoriston Image copyright Forestry Commission Scotland
Image caption Thuit dà chreig mhòr, agus sprùilleach eile, air an A82 air a' mhìos a chaidh.

Thòisich Coimisean na Coilltearachd obair gus na mìltean de chraobhan a tha ri taobh an A82 a leagail, gus dìon a chur air an rathad.

Thathas den bheachd gur e seann chraobh dharaich a thuit air càrn a dh'adhbharaich dùnadh an rathaid air a' mhìos a chaidh, nuair a chaidh a bhacadh le creagan mòra.

Bha an rathad dùinte eadar Inbhir Moireasdan agus Druim na Drochaid fad ceithir làithean.

Tha an Coimisean ag ràdh gun cuidich a bhith a' leagail nan craobhan an leithid sin a sheachnadh san àm ri teachd.

Heileacoptair

Ach thuirt iad gun toireadh an obair bliadhnaichean mus biodh e ullamh.

Air a' mhìos a chaidh, thuit dà chreig mhòr air an rathad mu dhà mhìle tuath air Inbhir Moireasadan.

B' fheudar seach-shlighe de 120 mìle a chur air dòigh airson leigeil le dràibhearan fhaighinn seachad air.

Thug Coimisean na Coilltearachd sgioba shònraichte a-steach gus creagan eile a bhathas a' meas cunnartach don rathad a thoirt air falbh.

Thugadh uidheamachd brisidh chreagan chun an lethaid os cionn an rathaid le heileacoptair.

An dèidh dhaibh tuill a dhèanamh sna creagan, steall iad measgachadh ceimigeach a-steach air na creagan as motha, a dh'at, gan sgàineadh, gus an gabhadh na pìosan nas bige gluasad.

Thèid heileacoptair a chleachdadh an lùib na h-obrach gus na craobhan a leagail cuideachd.