Tuathanasan bainne Ghiogha ann an staing

Bainne Image copyright Yui Mok
Image caption Chaidh innse do thuathanaich Ghiogha gum feum iad feitheamh air am pàigheadh, agus faraidhean làraidhean a' bhainne thar an aiseig a phàigheadh.

Tha na tuathanasan bainne ann an Eilean Ghiogha ann am fìor chunnart a dhol à bith uile gu lèir leis an staing sa bheil an gnìomhachas.

Tha trioblaidean mòra aig a' ghnìomhachas air feadh na h-Alba leis mar a tha prìs a' bhainne air tuiteam gu mòr.

Tha tuathanaich a' faighinn nas lugha gach liotair na tha e a' cosg dhaibh na beathaichean a chumail.

Ach tha a' chùis gu h-àraid dona ann an àiteachan iomallach mar Giogha.

Tha ceithir tuathanasan bainne san eilean.

Thuirt a' bhuidheann First Milk bho chionn cola-deug, gum feumadh tuathanaich fuireach air am pàigheadh ri linn an staing sa bheil an gnìomhachas an-dràsta.

Tha prìs a' bhainne air tuiteam gu mòr ri linn 's gu bheil tuilleadh 's an còrr bainne air na margaidhean eadar-nàiseanta.

Tha a' chùis cho duilich 's gu bheil Pàrlamaid na h-Alba air rannsachadh a chur air dòigh.

Tha tuathanaich Ghiogha an urra ri aiseagan airson am bainne, a chur gu Tìr Mòr.

Cha bhithear a' togail a' bhainne ann an Giogha ach a h-uile dàrnacha là.

Dh'innis First Milk dhaibh, a thuilleadh air a bhith a' stòradh a' bhainne eadar na làithean sin, gum feum iad tòiseachadh air faraidhean nan làraidhean thar an aiseig a phàigheadh.

Mar sin, tha prìs ìseal a' bhainne a' cur ri duilgheadasan do na tuathanaich, agus tha cuid aca ag ràdh, mura tig piseach gu math luath air an t-suidheachadh, nach bi roghainn aca ach an cùl a chur ri crodh bainne.