Cuireadh do mhinistear ùr

Air fhoillseachadh
fo-thiotal an deilbhTha Comhairle nan Eilean ag iomairt airson Sgeama nan Taighean Croite àrdachadh gu mòr, am measg rudan eile.

Tha Comhairle nan Eilean Siar air cuireadh a thoirt dhan mhinistear ùr le uallach airson croitearachd a thighinn dha na h-eileanan airson barrachd eòlais fhaighinn air a' ghnothach.

Chaidh Aileen NicLeòid ainmeachadh mar mhinistear na h-àrainneachd, atharrachadh na sìde is ath-leasachadh an fhearainn mar phàirt den chrathadh a thug am Prìomh Mhinistear ùr, Nicola Sturgeon, air a' chaibineat aice air a' mhìos a chaidh.

B'e Pòl Wheelhouse a bha san obair sin roimhe.

Choinnich riochdaireachdan bho Chomhairle nan Eilean ris anns na laithean mu dheireadh mus deach a ghluasad gu bhith na mhinistear airson sàbhailteachd sa choimhearsnachd agus gnothaichean laghaileachd.

Dùblachadh

Aig a' choinneimh sin chaidh iarraidh air Mgr Wheelhouse dùblachadh co-dhiù a thoirt air Sgeama nan Taighean Croite a tha an-dràsta aig £22,000.

Thog riochdairean na Comhairle dragh cuideachd mu chlàradh chroitean is dh'iarr iad taic a bharrachd ri cosgaisean a' chlàraidh.

Thuirt iar-chathraiche Comataidh an Leasachaidh Sheasmhaich aig a' Chomhairle, Dòmhnall Crichton, gun robh iad air am misneachadh leis a' choinneimh is gum biodh e feumail dhaibh a-nise coinneachadh ris a' mhinistear ùr.

"Tha sinne ag iarraidh meall a naidheachd a chur air Aileen NicLeòid agus tha sinn ag iarraidh cuideachd a' toirt fa comhair na còmhraidhean a bh' againn còmhla ri Pòl Wheelhouse", thuirt Mgr Crichton.

"Cudromach"

"Tha sinn ag iarraidh a thoirt fa comhair grantaichean airson taighean croite agus dhà no trì rudan eile a tha cudromach a thaobh adhartais a dhèanamh a thaobh fearainn agus croitearachd.

"Tha sinn a' cur cuireadh thuice airson tighinn suas is faicinn ciamar a tha na nithean sin ag obair anns na h-eileanan.

"A' choinneamh a bh' againn ri Mgr Wheelhouse, 's e coinneamh mhath a bh' ann agus bha e a' toirt air bòrd na h-argamaidean a bh' againn.

"Cuideachd, bha oifigich ann agus tha iadsan, tha sinn an dòchas, a' toirt oideachadh dhan mhinistear ùr a thaobh dè an suidheachadh a th' againn", thuirt e.

Ceanglaichean Eadar-lìn Dàimheil

Chan eil am BBC an urra ri na tha air Làraichean-lìn air an taobh a-muigh