Stiùidio
Cha chluich seo air an uidheamachd agaibh

Naidheachdan 11:00m

18 An Lùnasdal 2014 Ùraichte aig Ùraichte aig

Iorac

Thuirt Daibhidh Camshron nach tèid Breatainn an sàs ann an cogadh eile ann an Iorac, an dèidh dearbhadh gu bheil itealain cogaidh Breatannach a' dol an sàs a-niste ann am barrachd is cobhair air an dùthaich sin. Tha itealain an RAF a' siubhal nas fhaide na sgìre Kurdistan, nas doimhne gu ruige Iorac, a dh'fhaighinn fiosrachaidh mu na feachdan Ioslamach aig a bheil smachd air a' mhòr-chuid de cheann a tuath na dùthcha. Thuirt am Prìomh Mhinistear ge-tà, nach tèid feachdan Breatannach an sàs air a' ghrunnd.

Assange

Thuirt Julian Assange, an duine a chur air bhonn an làrach-lìn Wikileaks, gum fàg e Ambasaid Ecuador ann an Lunnainn a dh'aithghearr. Tha an t-Suain ag iarraidh Mgr Assange a thoirt dhan dùthaich sin, far a bheil e fo chasaid mu ionnsaighean drabasta. Tha esan a' dol às àicheadh, agus tha e air a bhith a' faighinn comraich ann an Ambasaid Ecuador ann an Lunnainn bho chionn dà bhliadhna.

Referendum

Le mìos gus am bi bhòt ann air neo-eisimeileachd na h-Alba, tha an dà thaobh a' cur cabhag air an iomairt an-diugh. Tha Prìomh Mhinistear na h-Alba, Ailig Salmond, ann an Obar Bhrothaig ag innse dè bhiodh ro Alba mar dhùthaich neo-eisimeileach. Thuirt an iomairt Nas Fheàrr Còmhla gum bi iad, eadar seo agus an 18mh là den t-Sultain, ag amas air feadhainn nach eil cinnteach fhathast dè an taobh air an bhòt iad.

Missouri

Chaidh an Geàrd Nàiseanta a ghairm gu Ferguson ann an St Louis am Missouri sna Stàitean Aonaichte agus ar-a-mach mhòr am measg an t-sluagh an sin an dèidh dha na poilis deugaire dubh a mharbhadh nuair a loisg iad air bho chionn còrr is seachdain. Chleachd na poilis gas agus loisg iad stun grenades air an t-sluagh a tha a-muigh a' togail fianais air sràidean a' bhaile.

Aiseagan

Chuir Riaghaltas na h-Alba stòras de £500,000 air bhonn airson cùisean a dhèanamh nas fhasa do chiorramaich a' faighinn gu bàtaichean-aiseig agus goireasan aig na puirt. Bidh an stòras fosgailte do thagradh bhon roinn phoblaich agus bhon roinn phrìobhaidich. Thuirt Ministear Còmhdhail na h-Alba, Keith Brown, gum bu chòir na seirbheisean aiseig a bhith fosgailte dhan a h-uile duine.