21 a' call cosnaidh ann am Brùra

Air fhoillseachadh
Fo-thiotal an deilbh,
Thàinig an naidheachd gu bheil an t-ionad-fòn a' dol a dhùnadh mar chlach às an adhar.

Tha còrr air fichead cosnadh ga chall ann am Brùra agus a' chompanaidh Serco a' dùnadh an ionaid aca sa bhaile.

Bha Serco, a tha a' ruith sheirbheisean air feadh an t-saoghail, a' cumail cosnaidh ri 21 duine san ionad-fòn aca ann am Brùra.

Ach a-nis, thathar am beachd na h-obraichean sin a ghluasad a Ghlaschu, agus tha iad air cosnadh a thabhann do luchd-obrach Bhrùra an sin.

Thàinig an naidheachd gu bheil an t-ionad-fòn a' dol a dhùnadh mar chlach às an adhar dhan choimhearsnachd air taobh sear Chataibh.

Thuirt ceannard na comhairle san sgìre, Deirdre NicAoidh, gur e fìor bhuille a th' ann cosnaidhean a chall aig àm sam bith, ach gu bheil a' bhuaidh nas miosa buileach ann an coimhearsnachd bhig.

Tha Ms. NicAoidh a' cur ìmpidh air a' Chomhairle agus Iomairt na Gàidhealtachd 's nan Eilean obrachadh còmhla gus an t-suidheachadh a leasachadh.

Ceanglaichean Eadar-lìn Dàimheil

Chan eil am BBC an urra ri na tha air Làraichean-lìn air an taobh a-muigh