Iomairt NY2SY air tighinn gu ceann

Niall Iain Dòmhnallach
Image caption Bha Niall Iain air còrr is seachdain a chur seachad aig muir.

Tha an craoladair Niall Iain Dòmhnallach, a chuir roimhe iomradh leis fhèin tarsainn a' Chuain Shiair, ag ràdh nach eil e an dùil feuchainn air an dùbhlan tuilleadh am-bliadhna.

Thàinig an iomairt aige gu ceann oidhche Haoine nuair a dh'fhàg tubaist gum b' fheudar do mhaoir-chladaich nan Stàitean Aonaichte cobhair a dhèanamh air.

Dh'fhàg e New York air an 5mh là den Ògmhios, 's e an dòchas gun ruigeadh e Steòrnabhagh an ceann trì mìosan neo mar sin.

Chuir e fios air na maoir-chladaich ann am Falmouth an toiseach, às dèidh dha a dhruim agus a cheann a ghoirteachach, agus chuir iadsan brath gu maoir-chladaich nan Stàitean.

Chaidh a thoirt dhan ospadal, ach cha deach a leòn cho dona 's a bha e dùil an toiseach.

Prìomh amas

Tha e ag ràdh gur e am prìomhachas aige a-nis an t-eathar aige fhaighinn air ais 's i mu 100 mìle an ear air New Jersey.

Cha chluich seo air an uidheamachd agaibh
Niall Iain Dòmhnallach, a' bruidhinn air Aithris na Maidne.

"Tha a h-uile càil a th' agam co-cheangailte ris a' bhàta - tha an stuth agam fhathast air bòrd agus a h-uile sgillinn agam, chuir mi sin a-steach dhan bhàta airson pàigheadh air a son. Ma chailleas mi am bàta cha bhi sian agam, so sin am prìomh amas agam an-dràsta," thuirt e.

Thuirt e nach robh e air co-dhùnadh fhathast na thachras a thaobh na h-iomairt aige, ach nach biodh e ciallach dha feuchainn air a-rithist san aithghearrachd às dèidh dha a dhruim a ghoirteachadh.

Tuilleadh air an sgeulachd seo

Duilleagan Eadar-lìn co-cheangailte

Chan eil uallach air a' BhBC son na tha air làraichean-lìn eile