Dhèanadh "feachdan an dorchadais" gàirdeachas

Air fhoillseachadh
Fo-thiotal an deilbh, A' bruidhinn anns na Stàitean Aonaichte, thuirt am Morair Robasdan gun dèanadh "dealachadh" anns an Rìoghachd Aonaichte an saoghal air fad mi-thèarainnte.

Tha am Morair Robasdan, a bha roimhe na Àrd-Rùnaire air NATO, air a ràdh gum biodh dùthchannan an iar gu mòr air an lagachadh nam biodh Alba neo-eisimeileach.

A' bruidhinn anns na Stàitean Aonaichte, thuirt am Morair Robasdan gun dèanadh "dealachadh" anns an Rìoghachd Aonaichte an saoghal air fad mi-thèarainnte.

Thuirt neach-labhairt dhan Phrìomh Mhinistear ge-tà, gu bheil mòran aig Alba ri thabhainn dhan t-saoghal mar dhùthaich neo-eisimeileach.

Thuirt iad cuideachd gu bheil an referendum na mhodail air deamocrasaidh, mar a thuirt Rùnaire Stàite nan Stàitean Aonaichte bho chionn ghoirid.

Feachdan an dorchadais

Bha briathrachas a' Mhorair Robasdan làidir, 's e ag ràdh gu bheil àite Bhreatainn mar "acair dìon an iar" ann an cunnart.

Thog e air "feachdan an dorchadais" agus an gàirdeachas a dhèanadh iadsan, nam bhòtadh Alba airson an Rìoghachd Aonaichte fhàgail.

Bha Mgr Robasdan airson cur an cuimhne dhaoine cho cudromach is cumhachdadh 's a tha Breatainn a thaobh tèarainnteachd an t-saoghail, agus cho millteach 's a bhiodh e nan deadh Breatainn, mar a dh'aithnichear e an-dràsta, à bith.

"'S ann bho ar co-chòmhragaichean agus ar nàimhdean a thigeadh a' ghleadhraich as àirde.

"Bhiodh e "cataclysmic" nan deadh an dàrna cumhachd armailteach san taobh an iar na bhloighean am-bliadhna," thuirt e.

NATO

Bha am Morair Robasdan e fhèin na Rùnaire Dìon do Bhreatainn eadar 1997 agus 1999.

Tha e làidir den bheachd gu bheil NATO nas làidire leis an Rìoghachd Aonaichte mar phàirt dheth.

Thuirt e gu bheil dragh air Riaghaltas nan Stàitean Aonaichte mu na bhiodh e a' ciallachadh do dhìon nam bhòtadh sluagh na h-Alba airson neo-eisimeileachd.

Mhol e gum bu chòir dhaibh na draghan a th' aca a dhèanamh follaiseach.

Tha an SNP ag ràdh ge-tà, gum biodh iad airson ballrachd fhaighinn ann an NATO, ach às aonais armachd niuclasaich an taobh a-staigh chrìochan na h-Alba.

Cron

Thuirt an Leas-Phrìomh Mhinistear, Nicola Sturgeon, gun robh i "air h-uabhasachadh" le mar a bhruidhinn am Morair Robasdan.

Thuirt i: "Tha na thuirt Seòras Robasdan an-raoir, agus am briathrachas a chleachd e airson a ràdh, a' dèanamh cron mòr air an deasbad.

"Chan eil mi airson Seòras Robasdan a chiùineachadh, tha mi ag ràdh, cho follaiseach 's a ghabhas, gu bheil mi den bheachd gu bheil na briathran aige tàireil.

"B' esan am fear a thuirt gun cuireadh fèin-riaghladh às dhan SNP gu tur ge-tà, 's mar sin cha chuirinn cus brìgh san fhàisneachd aige.

A rèir Ms Sturgeon, tha am Morair Robasdan air a chùl a chur ri deasbad chiallach sam bith a dhèanamh.

Ceanglaichean Eadar-lìn Dàimheil

Chan eil am BBC an urra ri na tha air Làraichean-lìn air an taobh a-muigh