Bliadhna ùr mhath aig County

Air fhoillseachadh
Tùs an deilbh, SNS
Fo-thiotal an deilbh, Bha County air an dòigh aig deireadh a' gheama.

Thòisich Ross County 2014 le brag is iad air trì puingean luachmhor a thoirt bho na nàbaidhean aca, Caley Thistle.

Cha b' ann le cus misneachd a chaidh sgioba Inbhir Pheofharain tarsainn air Drochaid Cheasaig is iad gun geama a bhuannachadh 'son cha-mhòr trì mìosan.

'S iad Caley Thistle a thòisich a b' fheàrr is deagh chothrom aig Billy MacAoidh tràth sa gheama às dèidh do dh'oidhirp bho Doran am post a bhualadh.

'S ann aig an taobh eile a thàinig a' chiad tadhal ge-tà, Scott Boyd a' cur a' bhuill dhan lìon bho 10 slatan.

Tadhal eile

Mionaid às dèidh sin, bha County 2-0 air thoiseach.

B' ann bho Ailig Cooper an thàinig an tadhal is e a' bristeadh seachad air Graeme Shinnie mus do chuir e am ball seachad air Brill ann an lìon Chaley Thistle.

A dh'aindeoin gach oidhirp bho sgioba Inbhir Nis, cha do chruthaich iad mòran de chothroman, is dh'fhulang iad buille eile le cairteal na h-uaireach ri dhol is càirt dhearg 'son Ross Draper is coltas ann gun do bhuail e Kettlewell le uilinn.

Thàinig tadhal do Chaley Thistle mu dheireadh thall le mionaid air fhàgail is Aaron Doran a' cur a' bhuill dhan lìon ach bha e cus ro anmoch is thill County dhachaigh leis na trì puingean.

Buaidh chudromach do sgioba Dherek Adams is bha iad gu follaiseach air an dòigh aig deireadh a' gheama.