Dragh mu ìre na seirbheis aiseig ùire

Air fhoillseachadh
Tùs an deilbh, Undiscovered Scotland
Fo-thiotal an deilbh,
Bidh an sgeama pìleat a' ruith trì bliadhna.

Tha dragh ann an Uibhist mu cho tric 's a tha an t-seirbheis aiseig ùr eadar Loch Baghasdal is Malaig air a bhith dheth bho thòisich i.

Chan eil Cal Mac air an clàr-ama airson na seirbheis ùire a choileanadh ach ceithir làithean thairis air a' chiad mhìos.

Tha luchd-siubhail is gnìomhachasan ag ràdh gu bheil a' mhì-chinnt a' cur bacadh orra an t-seirbheis a chleachdadh, rud a dh'fhaodadh nam beachdsan buaidh a thoirt air an sgeama pileat san fharsainneachd.

"A Ghlaschu, tha sinne a' ruith trì trupan san t-seachdain, agus bhiodh i gu math freagarrach airson sin," thuirt Eachan Stiùbhairt bhon chompanaidh mhaoraich Kallin Shellfish.

"Ach dh'fheumadh cinnt a bhith againn gun robh i gus a bhith ann.

"O chionn 's, nuair a tha sinne a' cur rud air falbh feumaidh sinn a bhith cinnteach gun ruig e far an robh e a' dol.

"Chan urrainn dhuinn a bhith ga chur an taobh sin, ged a chòrdadh e rinn a bhith taiceil dha," thuirt e.

Thuirt neach-labhairt bho Chal Mac gu bheil e na bhriseadh dùil dhaibhsan cuideachd gu bheil fìor dhroch shìde air bacadh a chur air an t-seirbheis thuige seo.

Thuirt iad ge-tà, gum biodh e gòrach barail a thoirt seachad air sgeama pileat a mhaireas trì bliadhna, às dèidh dìreach ceithir seachdainnean.