Ceist na ceiste a' leantainn

Ceist Ghàidhlig
Image caption Tha oidhirp a' leantainn gus toirt air an Riaghaltas aontachadh ri pàipear-baileat dà-chànanach.

Feuchaidh BPA ri bile referendum neo-eisimeileachd na h-Alba atharrachadh gus an nochd a' Ghàidhlig air a' phàipear-bhòtaidh còmhla ris a' Bheurla.

Thuirt Cathraiche Buidheann Thar-phàrtaidh na Gàidhlig, BPA na h-Eaglaise Brice Aonghas MacDhòmhnaill, gun iarr e taic na Pàrlamaid airson ceist an referendum a chur sa Ghàidhlig cho math ris a' Bheurla mus tig a' bhòt mu dheireadh air a' bhile.

Tha Riaghaltas na h-Alba a' moladh pàipear-bhotaidh anns a' Bheurla a-mhàin.

Thuirt iad gu bheil iad 'son an referendum a stiùireadh ann an dòigh ris am bi luchd-bhòtaidh cleachdte.

Tha e air tighinn am bàrr cuideachd gun tèid iarraidh air Coimisean an Taghaidh beachdachadh air an cuireadh pàipear-bhòtaidh dà-chànanach luchd-bhòtaidh troimhe-chèile.

Sgrìobhadh

Dh'aontaich Comataidh nan Ath-chuingean aig Holyrood Dimàirt sgrìobhadh dhan choimisean às dèidh dhaibh cluinntinn bho fhear-iomairt na Gàidhlig, Iain MacLeòid.

Chuir Mgr MacLeòid ath-chuinge air adhart mun ghnothach is còrr is 700 duine air an ainm a chur ris.

Thug Mgr MacLeòid fianais anns a' Ghàidhlig dhan chomataidh agus thuirt e gur e ceist bheag shìmplidh anns a' Ghàidhlig a bhiodh ann, is nach bu chòir an leithid mì-chinnt sam bith a dhèanamh.

Thuirt e gu bheil pàipearan dà-chànanach air a bhith ann tric ann an taghaidhean san Rìoghachd Aonaichte.

Air a' cheann thall dh'aontaich a' chomataidh sgrìobhadh gu Coimisean an Taghaidh gus am beachd fhaighinn air a' chùis.

Tuilleadh air an sgeulachd seo

Duilleagan Eadar-lìn co-cheangailte

Chan eil uallach air a' BhBC son na tha air làraichean-lìn eile