Cùisean mèirle an Inbhir Nis a' crìonadh

Oifigear-poilis
Image caption Thug na Poilis grunn daoine fo amharas mèirle an grèim sna beagan sheachdainnean mu dheireadh.

Thuirt na Poilis ann an Inbhir Nis gu bheil iad mothachail mun dragh a tha air daoine sa bhaile mu mhèirle ga dhèanamh ann an dachaighean agus togalaichean sa bhaile.

Ach, iad ag ràdh gun tàinig lùghdachadh san t-seòrsa eucorra seo an dèidh do ghrunn dhaoine a bhith air an toirt an grèim bho chionn ghoirid.

Thàinig sreath de chùisean mèirle ann an Inbhir Nis gu aire nam meadhanan an toiseach nuair a chuir boireannach iomairt air dòigh air Facebook an dèidh dhi stad a chur air neach a bha air briseadh a-steach dhan dachaigh aice.

Comhairle

Tha na Poilis a-nis air dearbhadh gun deach mèirle a dhèanamh ann an grunn dachaighean sna mìosan mu dheireadh.

Ach, dh'fheuch ceannard sgìreil an feachd, an t-Àrd-Inspector Graeme Murdoch, ri inntinn dhaoine a chur air fois, ag ràdh gu bheil àireamh nan cùisean eucorra seo air crìonadh sa chola-deug mu dheireadh an dèidh còignear, a chaidh a dhìteadh roimhe, a bhith air an toirt an grèim.

Chuir na Poilis ìmpidh, ge-tà, air daoine na dorsan agus uinneagan aca a chumail glaiste air an oidhche, agus nuair a tha iad a-muigh.

Mhol am feachd cuideachd do dhaoine dealbhan a thogail den àilleas aca agus de nithean luachmhor eile, agus àireamhan-comharrachaidh nan rudan sin a chumail sgrìobhte am badeigin.

Duilleagan Eadar-lìn co-cheangailte

Chan eil uallach air a' BhBC son na tha air làraichean-lìn eile