Stiùidio
Cha chluich seo air an uidheamachd agaibh

Naidheachdan 11:00m

23 An Cèitean 2013 Ùraichte aig Ùraichte aig

Woolwich

Tha dùil gum bi am Prìomhaire Dàibhidh Camshron a' bruidhinn air Sràid Downing a dh'aithghearr, an dèidh na h-ionnsaigh ann an Woolwich an-dè. Bha e anns a' Chathair aig coinneimh èiginnich de bhuidheann an Riaghaltais "Cobra" an-diugh, an dèidh na h-ionnsaigh. Chaidh a dhearbhadh gun robh an duine a chaidh a mharbhadh anns na feachdan armaichte, agus tha amharas ann gur e ionnsaigh radaigeach Ioslamach a bh' ann. Chaidh aon fhear a chlàradh le fuil air a làmhan ag ràdh gun do mharbh e an duine seach gun robh saighdearan Breatannach a' marbhadh Mhuslamach gach là.

Eaconamaidh Bhreatainn

Tha figearan oifigeil a' sealltainn nach deach eaconamaidh Bhreatainn air ais ann an crìonadh air a' mhìos a chaidh. Tha na figearan mar dhearbhadh air àireamhan a sheall gun tàinig fàs de 0.3% airson a' chiad trì mìosan den bhliadhna.

Flybe

Dh'innis a' chompanaidh Flybe gu bheil iad a' reic nan àiteachan èirigh agus laighe aig Port-adhair Gatwick ann an Lunnainn chun na companaidh Easyjet. Tha seo airson cosgaisean a chumail sìos. Ach tha draghan ann mun bhuaidh a dh'fhaodadh seo toirt air ceanglaichean adhair bhon Ghàidhealtachd, agus cuid den bheachd gum faodadh àrdachadh tighinn air prìsean no atharrachadh air uairean siubhail.

Càbal a' Chuain Sgìth

Tha rabhadh air tighinn à Leòdhas gun cuir a' mhì-chinnt mu chàbal dealain eadar na h-Eileanan agus Tìr Mòr dàil air a' phròiseact chumhachd mhara as motha ann am Breatainn. Dh'innis Riaghaltas na h-Alba an-dè gun robh iad air làn-chead a thoirt do dh'Aquamarine Power airson tuath suailichean a chur a-mach bho chladach Shiadair ann am Barabhas.

Càraichean Nissan

Chaidh iarraidh air còrr air 130,000 carbad a thoirt air ais, leis a' chompanaidh Nissan air a bhith ann an trioblaid co-cheangailte ri cuibhle-stiùiridh. Tha seo a' toirt buaidh air Micras aig Nissan a chaidh a dhèanamh ann an Sunderland eadar an Dùbhlachd 2002 agus an Cèitean 2006.

Seirbheis Aiseig Ùr

Tha seirbheis ùr a' ceangail Cinn Tìre, Siorrachd Àir agus Eilean Arainn a' tòiseachadh an-diugh. Bidh an t-seirbheis a' ruith as t-Samhradh, trì trup san t-seachdain, eadar Ceann Loch Chille Chiarain agus Àird Rosain, a' tadhail cuideachd air Eilean Arainn air Disathairne. Thèid a ruith an toiseach mar sgeama pìolat gu ruige 2016.