BBC Naidheachdan

Cumhachd an làin gu bhith a' fàs nas luaithe na cumhachd na gaoithe

Published
image copyrightOther
image captionTha cothroman gu leòr mu chladaichean na Gàidhealtachd airson chumhachd an làin.
Tha aithisg shònraichte a dh'fhoillsich an Comann Rìoghail a' cumail a-mach gun gabhadh 20% de dh'fheumalachdan dealain na Rìoghachd Aonaichte cruthachadh le cumhachd an làin.
Tha an aithisg, a chaidh fhoillseachadh Diluain, air pàipearan a sgrìobh àireamh de dh'àrd-luchd-acadaimigeach a tharraing ri chèile.
Tha luchd-poileataigs air targaidean mòra a chur mu choinneimh chumhachd ath-nuadhachail airson nam bliadhnaichean a tha ri teachd.
Thuige seo ge-tà, tha an teicneòlas a tha an lùib chumhachd an làin fhathast aig ìre thràith, gun a bhith air a dhearbhadh.
Tha an aithisg ag ràdh gun tig leudachadh air cumhachd an làin gu math nas luaithe na thig e air cumhachd na gaoithe.
'S ann air tuathan-gaoithe as motha a tha aire poileasaidh chumhachd Riaghaltas na h-Alba air a bhith, agus an teicneòlas sin air a thuigsinn gu ìre mhòir.
Tha àiteachan gu leòr air Ghàidhealtachd agus anns na h-Eileanan far an gabhadh buannachd a thoirt às an làn gus cumhachd a chruthachadh.
'S anns a' Chaol Arcach a tha sia de na prìomh dheich làraichean airson chumhachd an làin ann am Breatainn gu lèir.
Tha na h-uisgeachan mu Earra-Ghàidheal agus mu na h-Eileanan Siar cuideachd air am meas gu math freagarrach airson an teicneòlais.