150 tarbh do Chnoc nan Giall

Published
image copyrightGov
image captionBidh suas ri 150 tarbh gan cumail air an làraich.

Tha obair a' dol air adhart airson an tuathanas far a bheil tairbh sgeama an Riaghaltais air an cumail a thoirt gu ìre.

Thathas a' sùileachadh gum bi 150 tarbh gan cumail aig tuathanas Chnoc nan Giall, faisg air Inbhir Nis, air am faigh croitearan cothrom, seach a bhith a' giùlain tairbh air an fhearann aca fhèin.

Tha dùil gum bi an obair - luach £3m, agus air a dhèanamh le Robertson Construction Eta - deiseil as t-Earrach 2013.

An cois a' chùmhnaint, tha cothrom airson ceathrar oileanach-ciùird eadar 16 agus 19 bliadhna de dh'aois a bhith a' faighinn greis-ghnìomhachais.

Bidh an tuathanas air a leasachadh gus nach bi dad de sgudail ga chruthachadh ann.

A thuilleadh air buailtean nan tarbh, bidh aonad dàil-amharais far an tèid tairbh a th' air ùr-thighinn a-steach a chumail treis, aonad lèighis-sprèidh, agus seada mòr ioma-chleachdaidh.

Gheibh tuathanaich is croitearan cothrom tadhail air an làraich fhad 's a tha an obair a' dol air adhart.

Thèid cuideachd tursan sgoile a chur air adhart, far an ionnsaich clann mu na cunnartan a tha an luib làraichean togail, agus thuathanasan.

Gheibh sgoilearan cuideachd fiosrachadh mu chothroman obrach ann an gnìomhachas an togail.

Tha sgeama tharbh an Riaghaltais air a bhith ann o chionn còrr is 100 bliadhna.

Ceanglaichean Eadar-lìn Dàimheil

Chan eil am BBC an urra ri na tha air Làraichean-lìn air an taobh a-muigh