Rabhadh mu fhèidh air na rathaidean

Fèidh
Image caption Faodaidh fèidh a bhith nan cunnart mòr air na rathaidean

Tha Dualchas Nàdair na h-Alba a' toirt rabhaidh do dhràibhearan a bhith mothachail gum faod fèidh a bhith nan cunnart air na rathaidean.

Tha iad ag ràdh gu bheil barrachd fhiadh air na rathaidean anns a' Chèitean 's an fheadhainn òg a' dol a-mach leotha fhèin airson a' chiad uair.

Thèid soidhnichean rabhaidh a chur air cuid de phrìomh-rathaidean na h-Alba bho Dhiluain an 14mh dhen Chèitean, ann an sgìrean far am faod fèidh a bhith nan trioblaid.

Bidh na soidhnichean seo rim faicinn ann an àitean faisg air Glaschu, Dùn Èideann, Peart agus Obar Dheathain a thuilleadh air Inbhir Nis.

Tubaistean

Bidh mu 7,000 tubaist-rathaid ann an Alba gach bliadhna anns a bheil fèidh an sàs, agus cosgais de mu £5m nan lùib.

Thuirt Oifigear nam Fiadh aig SNH, Jamie Hammond, gu bheil tubaistean le fèidh air fàs tòrr nas bitheanta faisg air na bailtean mòra, ach mhol e do dhràibhearan a bhith gu math faiceallach ma tha iad a' dol seachad air coille neo àite sam bith eile far a bheil na beathaichean buailteach a bhith.

Dh'iarr e air duine a bhualas ann am fiadh fios a chur air na poilis gun fhios nach deach am beathach a ghoirteachadh.

Duilleagan Eadar-lìn co-cheangailte

Chan eil uallach air a' BhBC son na tha air làraichean-lìn eile