Talla Bhaile Steòrnabhagh gus fosgladh

Talla Bhaile Steòrnabhaigh Image copyright Undiscovered Scotland
Image caption Bha dragh air cuid mu na planaichean airson an togalaich

Fosglaidh Talla Bhaile Steòrnabhaigh Diciadain às dèidh obair-leasachaidh chonnspaidich.

Bha dragh mòr air cuid aig toiseach gnothaich gum milleadh an obair an talla.

Ach tha a' Chomhairle ag ràdh gu bheil iad misneachail a-nis gu bheil a' mhòr-chuid riaraichte leis an obair, 's gur e goireas math a bhios ann dhan choimhearsnachd.

"Chì daoine leasachadh mòr air talla a' bhaile, togalach cho cudromach 's a th' ann am baile Steòrnabhaigh," thuirt Fear-labhairt Chomhairle nan Eilean Siar, Joe Mac a' Phì.

Ath-bheothachadh

"Chan e a-mhàin an leasachadh air an taobh a-muigh, ach an leasachadh a rinn sinn air an taobh a-staigh, agus 's e prìomh amas a' phròiseict ath-bheothachadh a thoirt air an togalach.

"Dh'fhosgail sinn na h-uinneagan a bh' ann am mullach an togalaich. Bha iad ann co-dhiù, ach bha iad air an dùnadh.

"Chaidh iad sin fhosgladh agus tha solas an là a' sruthadh a-steach dhan talla fhèin.

"Cuideachd ann an cuid de na rumannan chaidh leasachadh mòr a dhèanamh, agus cuideachd shuas air a' bhalcanaidh.

"Rinn sinn tòrr bruidhinn ris na daoine anns a' choimhearsnachd mu dheidhinn nan rudan a bha a' dol a ghabhail àite.

"Bha cuid de dhaoine a' smaointinn gur e fìor mhilleadh a bhathas a' dol a dhèanamh air, ach cha robh sin riamh anns an amharc.

"Tha mi a' smaointinn ann a bhith a' bruidhinn ris na daoine a-niste, tha iad a' faicinn, "o uell, tha sinn a' faicinn an rud a bha sibh a' feuchainn ri dhèanamh."

"Gabhaidh an t-àite a chleachdadh fhathast mar a bha. Ach a-niste bidh tòrr a bharrachd dhaoine ga chleachdadh, agus bidh feum ga dhèanamh dheth - rud nach robh ron a seo," thuirt e.

Duilleagan Eadar-lìn co-cheangailte

Chan eil uallach air a' BhBC son na tha air làraichean-lìn eile