Stiùideo
Cha chluich seo air an uidheamachd agaibh

Naidheachdan 11:00m

9 Am Màrt 2012 Ùraichte aig Ùraichte aig

Nigeria

Tha luchd-poileataigs na h-Eadailte airson faighinn a-mach carson nach deach bruidhinn ris an riaghaltas acasan mus do thòisich iomairt gus Breatannach agus Eadailteach a bha am bruid ann an Nigeria a shaoradh. Chaidh Chris MacMhànuis agus Franco Lamolinara, a bh' air a bhith an grèim bhon Chèitean an-uiridh, a mharbhadh ann an sabaid chruaidh.

Rangers

Coinnichidh luchd-rianachd Rangers ri cluicheadairean an-diugh mar oidhirp aonta a ruighinn airson tuarastail a ghearradh agus obraichean a ghlèidheadh. Mur a bi aonta ann an-diugh tha iad ag ràdh nach bi rian nach caill daoine an cuid chosnaidhean.

Eric Joyce

Dh'aidich Ball na h-Eaglaise Brice ann am Pàrlamaid Westminster, Eric Joyce, gun robh e ciontach de cheithir casaidean ionnsaigh aig èisteachd ann an Cùirt nam Maighstirean ann an Westminster. Bha na casaidean an co-cheangail ri tachartas aig Taigh-seinnse nan Strangers ann an Taigh nan Cumantan air a' mhìos a chaidh.

Gleann Comhann

Thòisich na Poilis sgrùdadh às dèidh bàs dithis fhireannach ann an tubaist-rathaid ann an Gleann Comhann an-dè. Thachair an tubaist eadar làraidh agus càr, mu mhìle deas air a' bhaile fhèin air an A82. Bha an rathad dùinte gu mu 08:00m an-diugh sa mhadainn. Tha na Poilis airson bruidhinn ri duine sam bith le fiosrachadh mu na thachair.

Inbhe UNESCO

Tha an Comunn Gàidhealach a' moladh iomairt airson inbhe UNESCO fhaighinn dha na h-Eileanan an Iar mar làrach shònraichte a thaobh na Gàidhlig. Tha an Ceann-suidhe aca, Iain MacLeòid, ag iarraidh gun dèan Comhairle nan Eilean Siar, Riaghaltas na h-Alba agus na buidhnean Gàidhlig tagradh, a' togail air a' bhunait choimhearsnachd a th' aig a' chànan anns an sgìre. Tha e ag ràdh gun toireadh inbhe dhe leithid togail air obair-leasachaidh na Gàidhlig ann.

A' Ghrèig

Tha Riaghltas na Grèige ag ràdh gun d'fhuair iad aonta leis an fheadhainn aig a bheil barantasan ionmhais leotha a chuireas às do chuid mhath de na fiachan a th' orra. tha an t-aonta a' leigeil leotha an dàrna cnap airgid fhaighinn bhon IMF agus an t-Aonadh Eòrpach.