Càineadh air seirbheisean taic

Air fhoillseachadh
fo-thiotal an deilbhTha pàrantan a' gearain mu dhìth ghoireasan taic ann am priomh bhaile na Gàidhealtachd

Tha cuid de phàrantan ann an Inbhir Nis aig a bheil clann chiorramach a' gearain nach eil ionad freagarrach anns a' bhaile far am faigh òganaich cobhair eadar-amail.

'S ann an Gallaibh a tha an goireas sònraichte as fhaisge orra.

Tha cuid de phàrantan a-nis a' cur ìmpidh air Comhairle na Gàidhealtachd ionad a stèidheachadh ann an Inbhir Nis fhèin a dh'aona ghnothaich do dh'òigridh aig a bheil feumalachdan sònraichte.

Cùram freagarrach

Tha aona phàrant, Cairistiona Fhriseal, ag ràdh nach d' fhuair an nighean aice-se curam eadar-amail bho chionn ceithir bliadhna air sgàth 's nach deach taic freagarrach a thabhann oirre.

Tha a' Chomhairle ag ràdh ge-tà gur ann a tha nas lugha iarrtais ann a-nis airson seirbheisean còmhnaidh dha leithid, agus gur ann a bhios teaghlaichean a' cur cùisean air dòigh dhaibh fhèin le cuideachadh bhuapa-san.

Thuirt Stiùiriche Roinn na h-Obrach Sòisealta, Bill Alexander, gur e diofar sheòrsaichean taic a tha dhìth air teaghlaichean.

Tha Comhairle na Gàidhealtachd ag ràdh gu bheil iad a' leasachadh nan seirbheisean cùraim aca airson inbhich òga.

Ceanglaichean Eadar-lìn Dàimheil

Chan eil am BBC an urra ri na tha air Làraichean-lìn air an taobh a-muigh