Càineadh ùr air mar a làimhsich SNH SAC Bharraigh

Tha aithisg a dh'ullaich eòlaiche saidheans do Chomhairle nan Eilean Siar a' càineadh mar a làimhsich Dualchas Nàdair na h-Alba molaidhean airson sgìre ghlèidhte mara (SAC) a stèidheachadh ann an Caolas Bharraigh.

Image caption Tha iasgairean Bharraigh air dragh mòr a nochdadh mu na planaichean

Tha aithisg Iain Mhitchell ag ràdh nach b' e saidheans a bh' air cùl nam molaidhean agus gu robh SNH ag atharrachadh an fhiosrachaidh a-rèir nam beachdan aca fhèin.

Tha i cuideachd a' fàgail air a' bhuidhinn nach do chum iad fiosrachadh ris a' choimhearsnachd fhad 's a bha an gnothach ga rannsachadh.

Chaidh SNH às àicheadh nan casaidean 's iad ag ràdh gu robh iad air na dòighean-obrach a leantainn mar bu chòir.

Connspaid

Tha iasgairean Bharraigh a-measg na tha a' cur an aghaidh na sgìre glèidhte 's iomagain orra gun cuireadh e am beò-shlaint ann an cunnart.

Tha fear de chomhairlichean na sgìre, Dòmhnall Manford, ag ràdh gu bheil e an dòchas gun atharraich an Riaghaltas am beachd air an SAC nuair a gheibh iad am fiosrachadh ùr seo.

"An rud as fheàrr do Riaghaltas sam bith 's e nuair a dh'aithnichear agus nuair a chì thu am fiosrachadh a chaidh a chur thugad nach eil e cho math 's bu chòir dha a bhith, gun dèan thu rudeigin mu dheidhinn", thuirt an Comh. Manford.

Thèid cùis SAC Bharraigh a dheasbad ann am Pàrlamaid na h-Alba 's am ball Tòraidheach Jamie MacGriogair air taic gu leòr fhaighinn airson deasbad a chumail.

Ged a tha SNH a' dol às aicheadh nach do lean iad na dòighean-obrach, agus nach do chum iad fiosrachadh ris a' phoball, tha iad a' gealltainn sùil a thoirt air na gnothaichean saidheansail air a bheil an aithisg a' togail.

Thèid am fiosrachadh a chruinnich Iain Mitchell a chur chun an Riaghaltais an cois na fianais eile mun bhuaidh a bheireadh an sgìre ghlèidhte air Barraigh.

Timcheall a' BhBC

Duilleagan Eadar-lìn co-cheangailte

Chan eil uallach air a' BhBC son na tha air làraichean-lìn eile