Edrych 'nôl ar bleidleisiau Brexit

Mae Tŷ'r Cyffredin wedi pleidleisio o blaid gofyn i'r Undeb Ewropeaidd am ymestyn cyfnod Erthygl 50 nes 30 Mehefin.

Mae'n rhaid i'r 27 aelod o'r UE gytuno i hynny, a hyd yn oed wedyn mae'r cyfnod yna'n dibynnu ar Gytundeb Ymadael Theresa May yn cael ei basio yr wythnos nesaf.

Y sefyllfa gyfreithiol o hyd yw y bydd y DU yn gadael yr UE ar 29 Mawrth, ond mae pleidlais heno yn awgrymu y gallai hynny newid gyda chydsyniad Ewrop.

Yn gynharach heddiw fe wnaeth Theresa May gadarnhau y bydd yn ceisio cael ASau i gymeradwyo ei chytundeb Brexit am y trydydd tro yr wythnos nesaf.

Dywedodd wrth ASau, os yw'r cytundeb yn methu eto, ei bod yn debyg y byddai angen oedi hir cyn gadael yr Undeb Ewropeaidd.

Y disgwyl yw y bydd pleidlais arall un ai dydd Mawrth neu ddydd Mercher.

Os yw ei chytundeb yn methu am y trydydd tro, yna fe allai Brexit gael ei ohirio ymhellach na 30 Mehefin. Dyna oedd dymuniad Tŷ'r Cyffredin yn y bleidlais nos Fawrth, ond ni wnaeth y bleidlais yna newid y gyfraith sy'n golygu fod y DU yn gadael yr UE ar 29 Mawrth.

Tŷ'r CyffredinCopyright: Tŷ'r Cyffredin

Y Sylwebydd Gwleidyddol, Tweli Griffiths yn dweud ar rifyn arbennig y Post Prynhawn fod dehongliad rhai bod 'na garfan gryf o fewn San Steffan o blaid refferendwm arall yn anghywir.

Ni fydd Guto Bebb, AS Aberconwy, yn pleidleisio ar y prif gynnig, a dywedodd wrth Radio Cymru nad yw'n credu y gall cytundeb ymadael Theresa May gael ei basio gan ASau yr wythnos nesaf.

Mae AS Rhondda, Chris Bryant, wedi tynnu nôl ei welliant yntau fyddai wedi galw ar ASau i wrthod pleidleisio eto at gytundeb ymadael Theresa May am y trydydd tro.

Dyma'r prif gynnig fydd gerbron Aelodau Seneddol heddiw, sef bod y DU yn ceisio cytuno estyniad i Erthygl 50 gyda'r Undeb Ewropeaidd... gohirio Brexit mewn geiriau eraill.

Gan nad yw un o'r gwelliannau wedi llwyddo, dyna'r bleidlais nesaf i ASau felly.

Nid yw'r cynnig yn manylu beth fyddai hyd unrhyw estyniad os nad yw Cytundeb Ymadael Theresa May yn cael ei basio cyn 20 Mawrth.

Tŷ'r CyffredinCopyright: Tŷ'r Cyffredin

Mae Gwelliant Jeremy Corbyn a Llafur wedi cael ei drechu.

O blaid - 302

Yn erbyn - 318

Roedd y cynnig wedi galw am ohirio Brexit er mwyn rhoi amser i geisio cyrraedd cyfaddawd fyddai'n dderbyniol i fwyafrif o ASau o bob plaid.

Gan fod Gwelliant I wedi methu o drwch blewyn, mae ASau nawr yn pleidleisio ar Welliant E sy'n cael ei gyflwyno gan Jeremy Corbyn a mainc flaen llafur.

Mae'n galw am wrthod cytundeb y prif weinidog a hefyd y syniad o adael heb gytundeb.

Mae hefyd yn galw am drefnu amser yn y senedd i Dŷ'r Cyffredin weithio tuag at gael mwyafrif o blaid strategaeth wahanol.

BBCCopyright: BBC

Ar y rhifyn arbennig o'r Post Prynhawn ar Radio Cymru mae Tweli Griffiths wedi bod yn egluro pwysigrwydd Gwelliant I.

"O'r pedwar gwelliant gerbron heno, gwelliant Hilary Benn oedd yn unig un â gobaith o gael ei basio," meddai.

"Mae'n un arwyddocaol, gan grŵp trawsbleidiol, i drio rhoi cyfle i'r senedd gael trafod gwahanol opsiynnau trwy ddwyn rheolaeth dros Dŷ'r Cyffredin oddi wrth y llywodraeth.

"Mae hynny'n ergyd fawr i'r bobl sydd naill ai'n gwrthwynebu Brexit yn llwyr neu'n gobeithio am un fwy meddal na chytundeb Theresa May."

Mae Gwelliant I wedi cael ei wrthod gan ASau yn San Steffan.

• O blaid - 312
• Yn erbyn - 314

Roedden nhw'n bwriadu defnyddio'r amser i drafod, a gallai fod wedi arwain at bleidleisio ar nifer o opsiynau gwahanol am Brexit.

Fel mae Gohebydd Gwleidyddol BBC Cymru, Cemlyn Davies yn egluro, fe wnaeth saith Aelod Seneddol Llafur o Gymru anwybyddu chwip y blaid a phleidleisio o blaid refferendwm arall.

Roedd y Blaid Lafur wedi gorchymyn ei haelodau i beidio pleidleisio ar y gwelliant.