Edrych yn ôl ar 5 Rhagfyr

Mae cyn-athro wedi cael dathlu ei ben-blwydd yn 80 yn ei hen ysgol.

Ar ddiwrnod ei ben-blwydd, roedd David Francis yn westai arbennig yn Ysgol Gynradd Llanhari, ble bu'n dysgu am 30 mlynedd.

Yn ôl Wales Online, roedd disgyblion yr ysgol wedi rhoi teyrnged i Mr Francis drwy wneud prosiect arbennih am ei fywyd.

Mae'r A5 ar gau yn Llanfairpwllgwyngyll gan fod pibell ddŵr wedi torri.

Y cyngor i yrwyr ydi i ddefnyddio'r A55 yn lle.

Fe fydd hi'n oer heno, gyda niwl a chymylau isel yn ffurfio yn ystod y nos yn y de. Tymheredd isaf: 0°C.

Bydd hi'n fore tywyll oherwydd y niwl, y tarth a'r cymylau isel, ond bydd hi'n gwella yn ystod y dydd, yn enwedig mewn ardaloedd arfordirol. Tymheredd uchaf: 11°C.

Mae dyn wedi cael ei gludo i Ysbyty Treforys wedi ymosodiad honedig mewn fferyllfa yn Rhydaman heddiw.

Mewn datganiad, dywedodd y Gwasanaeth Ambiwlans: "Fe gawson ein galw tua 13:05 wedi adroddiadau o ddigwyddiad mewn lleoliad ar Heol Cwmaman, Garnant, Rhydaman."

Does dim gwybodaeth am gyflwr y dyn.

Cafodd dyn 68 oed ei arestio yn sgil y digwyddiad ac mae yn y ddalfa.

BBCCopyright: BBC

Mae dyn 68 oed wedi cael ei arestio yn dilyn ymosodiad yn Fferfyllfa Garnant yn Rhydaman tua 12:30 heddiw.

Mewn datganiad, dywedodd Heddlu Dyfed-Powys bod y dyn wedi cael ei arestio yn y fan a'r lle, a'i fod yn y ddalfa. Dydyn nhw ddim yn chwilio am unrhyw un arall mewn cysylltiad â'r digwyddiad.

Mae'r fferyllfa ar gau ar hyn o bryd, ond mae'r ganolfan feddygol ar agor.

Mae'r heddlu'n apelio am dystion a gwybodaeth gan y cyhoedd.

Mae llys wedi clywed bod dyn wedi cynnau mwy nac un tân yn ei fflat cyngor er mwyn cadw'n cynnes. 

Bu'n rhaid bobl symud o fflatiau cyfagos wedi i James William Edwards, 28, o ardal Wrecsam wneud hynny. 

Fe roddodd y barnwr yn Llys y Goron Yr Wyddgrug orchymyn iddo dderbyn triniaeth mewn uned seiciatryddol yn Llanfairfechan.

Mae ymdrechion Gwylwyr y Glannau i ddod o hyd i fenyw yn ardal Aberteifi wedi dod i ben.

Yn ôl yr heddlu, mae timau arbenigol o'r Gwasanaeth Tân ac Achub yn parhau i chwilio yn Afon Teifi.

Mae disgwyl iddyn nhw orffen eu gwaith cyn hir, ac ailgydio yn y gwaith bore fory.

Travis Carter o Ysgol Gymraeg Cwmbrân yw enillydd y gystadleuaeth i lunio cerdyn Nadolig ar gyfer y Pirf Weinidog Carwyn Jones eleni. Llongyfarchiadau Travis!

Mae'n debyg bod yr undebau llafur a chwmni dur Tata yn agos i daro bargen fyddai'n cadw gwaith dur Port Talbot ar agor.

Cafodd trafodaethau eu cynnal rhwng y ddwy ochr yr wythnos diwethaf, ac mae'n bosib y gwnawn nhw ddod i gytundeb yr wythnos hon.

Mae dyfodol y gwaith ym Mhort Talbot a safleodd eraill gan gynnwys Llanwern, Trostre a Shotton, wedi bod yn y fantol ers i Tata gyhoeddi ym mis Mawrth eu bod am werthu eu safleoedd ym Mhrydain.

gettCopyright: gett

Roedd antur Cymru yn Euro 2016 yn dipyn o daith, ac roedd dod adref yn eithaf anodd i Owain Fôn Williams felly mae golwr Cymru, sy'n arlunydd yn ei amser sbar, wedi mynd ati i greu darlun i adlewyrchu hanes y daith yn Ffrainc.

Dywedodd wrth y Daily Post bod gwneud hynny wedi ei helpu i guro'r felan a'r comedown o ddychwelyd o Ffrainc.

Mae'r gyfansoddwraig Amy Wadge wedi cwyno am driniaeth honedig cyfaill iddi gan staff Trenau Arriva Cymru wrth iddo deithio yn ne Cymru, yn ôl WalesOnline.

Roedd ei chyfaill wedi ceisio prynu tocyn am ei daith ar ôl cyrraedd gorsaf Trefforest gan nad oedd swyddog ar y trên yn eu gwerthu, ond mae'n dweud i staff yr orsaf ei drin fel troseddwr.

BBCCopyright: BBC

Ar wefan Sefydliad Materion Cymreig, Click on Wales, mae Daran Hill yn trafod a yw Llywodraeth Cymru yn defnyddio pwerau deddfwriaethol cynradd yn effeithiol.

Daw hyn pum mlynedd wedi'r refferendwm a drosgylwyddodd bwerau deddfu cynradd i Gymru.

bbcCopyright: bbc

Mae Prifysgol Aberystwyth yn lansio strategaeth newydd ar gyfer ei myfyrwyr sydd yn rhestru ei blaenoriaethau ar gyfer ei darpariaeth cyfrwng Cymraeg.

Fel rhan o'r cynllun fe fydd y brifysgol yn cyflwyno cardiau maent yn galw yn 'Addewidion Aber' i fyfyrwyr sydd yn dewis astudio trwy'r Gymraeg sydd yn cynnwys profiad gwaith dwyieithog, sicrwydd o lety cyfrwng Cymraeg a thiwtor personol Cymraeg.

BBCCopyright: BBC

Wedi i'r gêm rhwng Ton Pentre a Bangor yng Nghwpan Cymru gael ei gohirio dros y penwythnos, mae Sgorio'n dweud y bydd y gêm yn cael ei chwarae y Sadwrn nesa ac y bydd yn fyw ar S4C.