Seren Cymru a'r Llewod, John Dawes wedi marw yn 80 oed

Published
image copyrightGetty Images
image captionFe wnaeth John Dawes ennill 22 cap dros Gymru, a bu'n gapten ar y tîm ar chwe achlysur

Mae cyn-gapten a hyfforddwr Cymru a'r Llewod, John Dawes wedi marw yn 80 oed.

Fe wnaeth Dawes ennill y cyntaf o'i 22 cap dros Gymru yn 1964, a bu'n gapten ar y tîm ar chwe achlysur, gan eu harwain at Gamp Lawn yn 1971.

Ef hefyd oedd capten y Llewod ar eu taith i Seland Newydd yn 1971 - yr unig dro erioed i'r Llewod ennill cyfres yn erbyn y Crysau Duon.

Wedi iddo ymddeol o chwarae bu'n hyfforddwr ar y tîm cenedlaethol mewn cyfnod welodd Cymru'n ennill Pencampwriaeth y Pum Gwlad ar bedwar achlysur a'r Gamp Lawn ddwywaith.

Roedd hefyd yn hyfforddwr ar y Llewod ar eu taith i Seland Newydd yn 1977.

Roedd yn gapten ac yn hyfforddwr ar Gymry Llundain hefyd yn y 60au hwyr a'r 70au cynnar - tîm oedd yn cynnwys sêr fel Mervyn Davies, JPR Williams, John Taylor a Gerald Davies.

Nid yw'r BBC yn gyfrifol am gynnwys safleoedd allanolGweld mwy ar Twitter

Dywedodd clwb cyntaf Dawes, Clwb Rygbi Trecelyn yn Sir Caerffili, ddydd Gwener: "Bydd pawb sy'n rhan o'n gêm yn ymwybodol o stori John a'i lu o orchestion.

"Fe ddechreuodd ei yrfa rygbi yma gyda ni. Mae pawb o Glwb Rygbi Trecelyn yn cydymdeimlo gyda theulu John ar yr amser trist iawn yma."

Straeon perthnasol