Cadarnhad na fydd ffatri Ineos Grenadier ym Mhen-y-bont

Cyhoeddwyd
Ffynhonnell y llun, Ineos

Ni fydd cerbyd 4x4 newydd Ineos yn cael ei adeiladu yn ne Cymru, yn dilyn cadarnhad gan y cwmni.

Roedd Ineos wedi bod yn gweithio gyda Llywodraeth Cymru ar gynllun i gynhyrchu'r cerbyd ym Mhen-y-bont ar Ogwr.

Ond ym mis Gorffennaf, dywedodd y cwmni ei fod yn atal y cynllun yna am y tro, wrth ymchwilio i safle arall yn Ffrainc.

Roedd gobaith y byddai cwmni wedi agor ffatri ger hen safle Ford - ble mae cannoedd o swyddi wedi eu colli.

Mewn datganiad ddydd Mawrth, cadarnhaodd Ineos y byddai'r cwmni'n lleoli ei ffatri yn Hambach yn ardal Moselle.

Dywedodd cadeirydd Ineos, y biliwnydd Syr Jim Ratcliffe, bod Hambach yn cynnig cyfle "nad oedd modd ei anwybyddu".

Ychwanegodd Ratcliffe, oedd yn gefnogwr blaenllaw o'r ymgyrch i adael yr Undeb Ewropeaidd yn 2016, ei fod yn deall y byddai'r penderfyniad yn siom i'r DU.

Pynciau Cysylltiedig