BBC Cymru Fyw

Kieffer Moore yn arwyddo i Gaerdydd o Wigan Athletic

Published
image copyrightHuw Evans picture agency
Mae Clwb Pêl-droed Caerdydd wedi arwyddo'r ymosodwr Kieffer Moore o glwb Wigan Athletic.
Cafodd cais yr Adar Gleision o £2.3m am y chwaraewr rhyngwladol ei wrthod ym mis Ionawr.
Wedi i Wigan fynd i ddwylo'r gweinyddwyr gan ddisgyn i Adran Un, roedd y chwaraewr 6 troedfedd 5 modfedd ar gael unwaith eto.
Y gred yw bod Caerdydd wedi talu ychydig yn llai na £2m am Moore.
Roedd clwb Middlesbrough, sydd dan reolaeth cyn-reolwr Caerdydd Neil Warnock, hefyd yn llygadu Moore, ond mae'r ymosodwr 28 oed wedi arwyddo i'r Adar Gleision ar gytundeb tair blynedd.
image copyrightGetty Images
image captionKieffer Moore yn sgorio i Gymru yn erbyn Azerbaijan
Roedd gan glybiau eraill ddiddordeb ynddo hefyd, ond Caerdydd oedd y cyntaf i'r felin y tro yma, a Moore yw'r chwaraewr cyntaf i glwb y brifddinas ei arwyddo yr haf hwn.
Bwriad rheolwr Caerdydd Neil Harris oedd i gryfhau'r elfen ymosodol, gyda Lee Tomlin yn gorffen tymor 2019-20 fel y prif sgoriwr gydag wyth o goliau.
Sgoriodd yr ymosodwr Robert Glatzel, y chwaraewr canol cae Joe Ralls a'r asgellwr Junior Hoilett saith gôl yr un ac fe ddaeth y clwb yn bumed yn y Bencampwriaeth, cyn colli i Fulham yn rownd gyn-derfynol y gemau ail-gyfle.
Daeth Moore yn ffefryn gyda chefnogwyr Cymru wedi iddo sgorio nifer o goliau pwysig yn erbyn Slofacia ac Azerbaijan yn yr ymgyrch lwyddiannus i gyrraedd Euro 2020.

Straeon perthnasol

  • Cymru v Hwngari: Yr enillwyr yn hawlio lle yn Euro 2020