Neil Warnock yn gadael ei swydd fel rheolwr Caerdydd

Neil Warnock Image copyright Huw Evans picture agency

Mae Clwb Pêl-droed Caerdydd wedi cadarnhau bod y rheolwr Neil Warnock wedi gadael y clwb.

Mewn datganiad, fe wnaeth y clwb gadarnhau eu bod wedi dod i gytundeb gyda Warnock i ddod â'i gyfnod fel rheolwr i ben.

Daeth Warnock yn rheolwr yr Adar Gleision yn Hydref 2016 gan eu harwain i Uwch Gynghrair Lloegr yn 2018.

Roedd y gŵr 70 oed yn ei flwyddyn olaf o'i gytundeb gyda'r clwb ac roedd eisoes wedi cyhoeddi y byddai'n gadael ar ddiwedd y tymor.

Ond fe fethodd a chadw'r clwb yn gynghrair, ac fe ddisgynnodd Caerdydd yn ôl i'r Bencampwriaeth yn syth.

'Wythnos waethaf'

Warnock oedd rheolwr y clwb pan fu farw'r ymosodwr Emiliano Sala mewn damwain awyren ym mis Ionawr.

Fe ddisgrifiodd Warnock y cyfnod fel yr "wythnos waethaf iddo erioed ei gael yn ei yrfa bêl-droed".

Image copyright Huw Evans picture agency
Image caption Fe waeth Neil Warnock arwain Caerdydd i Uwch Gynghrair Lloegr yn 2018

Roedd Warnock wedi goruchwylio 144 o gemau'r Adar Gleision yn ei dair blynedd wrth y llyw.

LLwyddodd i ennill 59 o'r rheiny, colli 29 a 56 o gemau cyfartal.

'Byddwch lwcus'

Mae'r Adar Gleision yn y 14eg safle yn y Bencampwriaeth wedi 16 gêm, ar ôl ennill pump, colli pump a chael chwe gêm gyfartal hyd yma.

Mewn datganiad dywedodd Neil Warnock: "Gobeithio eich bod i gyd wedi mwynhau'r daith.

"Dwi'n falch iawn o fod yn gadael y clwb yn unedig a gobeithio y byddwch i gyd yn cael y llwyddiant yr ydych i gyd yn ei haeddu.

"Byddwch lwcus," meddai.

Straeon perthnasol