Bulb yn dosbarthu mesuryddion clyfar Cymraeg ar hyd y DU

Mesuydd clyfar Image copyright MoneySavingExpert.com
Image caption "Defnydd heddiw" oedd yn dangos ar sgrin rhai o gwsmeriaid y cwmni

Mae rhai o gwsmeriaid cwmni ynni Bulb wedi derbyn mesuryddion clyfar Cymraeg - er nad ydyn nhw'n byw yng Nghymru nac yn siarad yr iaith.

Mae sawl ddefnyddiwr wedi dweud bod y mesuryddion yn uniaith Gymraeg, ac er mwyn newid yr iaith mae'n rhaid newid y gosodiadau - sydd hefyd yn Gymraeg.

Mae hyn wedi effeithio ar un o bob 200 o fesuryddion y cwmni, meddai llefarydd a ran Bulb.

Dywedodd un o gwsmeriaid y cwmni, James Tombs, sy'n byw yng ngorllewin Sussex: "Dydw i ddim yn byw yng Nghymru nac yn siarad Cymraeg... es i ar un o fforymau Bulb a gweld bod gan bobl eraill yr un broblem.

"Nes i ddilyn y cyfarwyddiadau ac mae popeth wedi bod yn iawn ers hynny."

Ychwanegodd y llefarydd ar ran Bulb: "Mewn rhai achosion prin mae mesuryddion clyfar yn newid i fod yn Gymraeg. Er ein bod ni'n meddwl bod y Gymraeg yn iaith grêt, rydyn ni'n deall bod nifer o bobl eisiau defnyddio'r mesuryddion drwy gyfrwng y Saesneg."

Straeon perthnasol