Tîm achub i chwilio am Gymro sydd ar goll yng Ngroeg

John Tossell Image copyright Llun teulu
Image caption Mae John Tossell wedi bod ar goll ar ynys Zante ers dros wythnos

Mae tîm achub mynydd o Gymru wedi cynnig helpu chwilio am ddyn sydd wedi bod ar goll yng Ngroeg ers dros wythnos.

Ni ddychwelodd John Tossell, sy'n 73 ac o Ben-y-bont, i'w westy ar ôl mynd i gerdded ar ynys Zante ar 17 Mehefin.

Fe dreuliodd gwasanaethau brys yr ynys wythnos yn edrych amdano, ond mae'r awdurdodau bellach wedi dod â'r chwilio i ben.

Mae Tîm Achub Mynydd Gorllewin y Bannau wedi cynnig helpu gyda'r chwilio, ond maen nhw angen codi £5,000 er mwyn gallu gwneud hynny.

Roedd Mr Tossell ar drydydd diwrnod ei wyliau gyda'i bartner Gillian ac roedd wedi mynd i gerdded i fynachlog ar Fynydd Skopos ger pentref Argassi pan aeth ar goll.

Mae gan Gareth Hopkins, un o'r achubwyr sy'n gobeithio teithio draw, gysylltiad teuluol â Mr Tossell: "Rydw i'n teimlo affinedd gydag ef a 'da ni jest eisiau mynd er mwyn gallu helpu'r teulu."

Gobaith y tîm yw codi arian er mwyn gallu talu am hediadau a llety ar gyfer y 13 aelod sy'n bwriadu teithio i'r ynys yn y dyddiau nesaf.

Mae dros £1,700 eisoes wedi ei gasglu ar wefan cyllido torfol.

Pynciau Cysylltiedig

Straeon perthnasol